Rēzeknē aizvadeita rodūšuo plakatu tekstu raksteišonys darbneica
Eiropys volūdu dīnā, 26. septembrī, Rēzeknē, Rēzeknis Centralajā bibliotekā, nūtyka latgalīšu kulturys kusteiba “Volūda” i organizacejis “Loesje Latvija” rodūšuo plakatu tekstu raksteišonys darbneica, kurā pyrmū reizi storptautyskuos “Loesje” kusteibys viesturē pyrmū reizi topa plakatu teksti latgaliski.
Rodūšuos raksteišonys darbneicā Rēzeknē kūpā vysā pasuokumā laikā pīsadaleja 10 daleibnīki. Izmontojūt “Loesje” tehniku, darbneicā beja vareiba īpasazeit ar “Loesje” plakatu veiduošonys kusteibu, tuos vierteibom, pīsadaleit vairuokūs rodūšuos raksteišonys īsasiļdeišonys aizdavumūs, kai ari pošim radeit saukļus, kas piečuok tiks izmontuoti malnboltūs “Loesje” plakatu taiseišonā. Tok darbneicys īvods suocēs ar eisu latgalīšu rokstu volūdys nūdarbeibu, kū nūvadeja latgalīšu kulturys ziņu portala lakuga.lv vadeituoja Edeite Laime. Interesentim varēja izzynuot 10 idejis, kai lobuok raksteit latgaliski, kai ari paraudzeit izpiļdeit sagataveitūs vyngrynuojumus. Nūdarbeibys prezentaceja daīmama ITE.
Storptautyskuo organizaceja “Loesje” rodusēs 1983. godā Nederlandē, bet niu tei puorstuovāta vaira nakai 25 pasauļa vaļstīs i vaira nakai 15 godu – nu 2006. gods – ari Latvejā, tok pyrmū reizi iz darbeibu, puordūmom voi pasmaideišonu aicynojūšī plakati tyka taiseiti ari latgaliski. Piec darbneicys vysus pīraksteitūs plakatu saukļus, kurus par lobuokajim atzyna poši darbneicys daleibnīki, apstruoduos “Loesje Latvija” aktivisti, vajadzeibys gadīnī saukli tiks puorlikti latgaliski, gramatiski precizāti i tod sagataveiti plakatu maketi. Plānuots, ka plakāti byus apsaverami vairuokuos izstuodēs, kuru vydā ari Rēzeknis Centraluo biblioteka. Tematiskī vierzīni, kurus izalaseja ari poši saguojušī darbneicys daleibnīki i par kū tyka radeiti teksti, ir volūda, karadarbeiba Ukrainā, dzeivinīki i cytys temys.
Plakatu tekstu darbneica ir vīns nu spēlis “Latgalīšu volūdai draudzeiga vīta – ite Rēzekne!” pasuokumu, sovpus spēle ir akcejis “Latgalīšu volūdai draudzeiga vīta” aktivitate. Akcejis, kuru eistynoj latgalīšu kulturys kusteiba “Volūda” i portals lakuga.lv, mierkis ir rūsynuot kasdīnys saziņā vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu attīksmi pret tū. Akcejis dalinīkus var atpazeit piec eipašu uzleimu ar tekstu “Latgalīšu volūdai draudzeiga vīta”. Vaira dazynuošonai par akceju i spēli ITE.
Spēle i cytys “Latgalīšu volūdai draudzeiga vīta – ite Rēzekne!” aktivitatis teik taiseitys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
