Portals lakuga.lv sajiems atbolstu diveju medeju projektu eistynuošonai

Sabīdreibys integracejis fonds (SIF) apstyprynuojs konkursa rezultatus Medeju atbolsta fonda (MAF) programā “Regionalūs, vītejūs i diasporys medeju atbolsta programa”. Nu Kulturys ministrejis budžeta daškiertūs leidzekļu programā apstyprynuoti 48 projekti, kurūs vydā ari diveji latgalīšu kulturys ziņu portala lakuga.lv projekti.

Latgalīšu kulturys ziņu portals lakuga.lv ituo gods MAF “Regionalūs, vītejūs i diasporys medeju atbolsta programys” projektu konkursā dabuojs atbolstu divejim portala īsnēgtajim projektim. Projekts “Latgaliskā kultūrtelpa: problēmas, analīze, diskusijas, dažādība un atspoguļojums portālā lakuga.lv” (kūpejais finansiejums 42948,20 eiro) ir svareigs atbolsta portala pastuoveigajai darbeibai, nūdrūsynojūt portala funkcejis, atbolstūs portala komandu i latgaliski viestejūt par latgaliskuos kulturys aktualitatem, procesim i nūtikšonom. Projektā planavuoti vaira nakai 100 roksti, kas papyldynuoti ar originalu foto saturu, 4 diskusejis, kas byus daīmamys ari video formatā, skaiteituoju aptaujis, 5 publikacejis žurnalā “A12”, kai ari vaira nakai 380 socialūs teiklu īrokstu (tymā vydā ari video formatā).

Taipat atbolstu dabuojs projekts “Raidījumu cikls “Latgales revīzija”” (finansiejums 14321,48 eiro), kas tiks eistynuots sadarbeibā ar kinys “Daugavpils – iespēju vai nespēju pilsēta?” veiduotuoju Vladislavu Romanovu. Projektā paradzāts radeit vysmoz treis raidejumu cyklu, kas skar vairuokys regionam aktualys temys.

Ar vysim ituo gods MAF projektu konkursā atbaļsteitajim projektim, kurūs vydā ari 18, kas viesteis ap temom, kas saisteitys ar Latgolu, var īpasazeit ITE.

Portals lakuga.lv dybynuots 2007. godā i tuo saiminīks ir latgalīšu kulturys kusteiba “Volūda” (bīdreiba “LgSC”). Portals ir vīneigais oficialais medejs pasaulī, kas kotru dīnu publicej viests viņ latgalīšu rokstu volūdā.