Portals lakuga.lv rokstu serejā “Muna vīta” viesteis par Latgolys vītu sajiutom administrativi teritorialajā reformā

Latgalīšu kulturys ziņu portals lakuga.lv, kuruo saiminīks ir bīdreiba “LgSC”, niu pīduovuos rokstu i video materialu sereju “Muna vīta” par vairuoku Latgolys vītu i tūs īdzeivuotuoju sajiutom ituo gods administrativi teritorialajā reformā, kai ari īsavērs kotrys vītys pīdareibys ceļūs viesturis gaitā. “Muna vīta” materialūs byus stuosti par Baļtinovu, Naujini i Pušmucovu.

Rokstu i video materialu serejis “Muna vīta” mierkis ir skaidruot jaunuos administrativi teritorialuos reformys izmainis, kai tuos ītekmej Latgolys regiona mozuos vītys, jemūt vārā kulturvidis, kulturpolitikys i pīdareibys vaicuojumus, serejis nūsaukumā simboliski savejūt, kai kotrys vītys īdzeivuotuoju sajiutys par sovu apdzeivuotū vītu, tai ari nūsaceitū vaicuojumu, kur tod ir tei pīdareibys vīta car laikim. Rokstu serejā varēs skaiteit i nūsavērt stuostus par dažaidom Latgolys vītom i tūs ļaudim. Kotru nu itūs vītu reforma ītekmej dažaidi – kuru vaira, kura tai i izmainis cīši napajiut. Serejā byus stuosti par Baļtinovu – īprīškejā teritoriali administrativajā īdalejumā mozuokū nūvodu Latvejā, bet niu cyta – Bolvu nūvoda – nu centra attuolu punktu, Naujini – vītu, kurai pīdareiba cīši nasamaineja, bet juopīrūn pi piļneigi jauna, da ituo nabejuša nūvoda nūsaukuma i reizē juosaprūt, kaids byus aizsuoktais process vēļ cytom izmaiņom iz prīšku – planavuotajai Augšdaugovys nūvoda apsavīnuošonai ar Daugovpiļs piļsātu, kai ari Pušmucovu, kuruos dzeivis ritmu nūvoda pīdareibys pamaineišona nu Cyblys iz Ludzys cīši naītekmej.

Sūpluok sasatikšonom ar nūvoda ļaudim, tūs sajiutom i puordūmom niulinejuos administrativi teritorialuos reformys procesūs, portalā varēs izzynuot vaira par kotrys vītys pīdareibu car laikim – kai bejs i kas pasamainejs godu symtu garumā. Taipat byus ari pa kaidai plašuokai sarunai ar itūs vītu aktivajim ļaudim.

Rokstu i video materialu sereju “Muna vīta” portala lakuga.lv komanda eistynoj Medeju atbolsta fonda finansātajā projektā “VĪTA”, projekta eistynuotuojs bīdreiba “LgSC”. Portala redaktoris Sandrys Ūdris sagataveitī stuosti par Baļtinovu i Naujini byus puorskaitomi ari žurnalā “A12”. Video materialu sagataveišonā sūpluok portala žurnalistei Sintijai Augustovai pīsadola Evita Broka i Ilva Anspoka, video grafikys taisejs Krišjānis Pleiko nu “Upes kinostudija”.

Portala skaiteituojim daīmami pyrmī rokstu serejis “Muna vīta” stuosti i video materials par Baļtinovu:

• Baļtinova administrativūs rūbežu puormejuos ITE
• Baļtinovai jaunuo reforma nav atsagrīzšona vacajā rajonā ITE
• Video “Muna vīta. Baļtinova”