Portala lakuga.lv atsavieršona iz 2024. godu
Portals lakuga.lv pīduovoj atsavērt iz padareitū 2024. godā i soka paļdis skaiteituojim par atbolstu, sadarbeibys partnerim par dareišonu kūpā i finansiejumu! Lai vysim laimeigs i veiksmeigs 2025. gods!
Vysvaira myusu sekuotuojim patyka video ar zyrgu sātys “Klajumi” saiminīkim Ilzi i Viktoru – tys portala Facebook lopā savuoce 199 tyukstūšys skatejumu. Rokstu par saiminīkim var puorskaiteit ITE.
Tok vysvaira cylvāki puorskaiteja rokstu par Jura Ostrovska jaunū dzīsmi “Latgolys pierteņa”. Dzīsmi var nūsaklauseit ITE.
Skaiteituojus vysuvaira interesēja tests par augu nūsaukumim latgaliski, kurū vari izpiļdeit ITE.
Itūgod lakuga.lv kalendarā dalyktys 1126 latgaliskuos nūtikšonys. Lai zynuotu vysys latgaliskuos nūtikšonys, tev juoīsaver myusu kalendarā, kurū atrassi ITE.
Cīši lela prīca par realizātū Aizsardzeibys ministrejis projektu “Drūss, vēļ drūsuoks – kleidynojam mitus par aizsardzeibu”, kas taiseits sadarbeibā ar Anželiku Litvinoviču i ReTV i kurā sataiseiti septeni video par aizsardzeibys nūzarei aktualom temom. Par projektu vaira vari dazynuot i vysus video nūsavērt vīnuvīt ITE.
Taipat itūgod kūpā ar Vladislavu Romanovu sagataveits raidejumu cyklys “Latgolys revizeja”, kurā treis raidejumūs runuots ap Latgolys regionam nūzeimeigom temom. Raidejumus verīsITE.
2023. i 2024. godā ari asam sasadorbuojuši ar škārsteikla žurnalu “Satori” . Jūs rokstu i raidīrokstu sereja “Latgolys vaicuojums”, kurā vaira pīsavērse vairuokim sprīdzis punktim Latgolys i Latvejis attīceibuos, puordūmojūt i analizejūt tū, kai tī veiduojušīs i veidoj myusu identitati, latvīšu literarajā volūdā skaitomi škārsteikla žurnalā “Satori”, bet latgaliski ari portalā lakuga.lv. Ar rokstim var īpasazeit ITE.
Sovpus jau ostoitū godu kūpā ar latgalīšu kulturys kusteibu “Volūda” i Latvejis Radejis Latgolys studeju asam organiziejuši diktatu latgaliski. Diktatu pīraksteit vēļ arviņ var ITE.
Nūorganizāta ari jau sastuo Latgalīšu kulturys goda bolvys “Boņuks” publikys simpatejis bolsuojuma bolva “Žyks” kūpā ar kasgadejim partnerim LSM. Itymā godā tū dabuoja amaterteatris “Palādas” nu Baļtinovys.
Asam snāguši publiciešonuos platformu jaunajim latgaliski rokstūšajim autorim i jau septembrī izsmāluši uorštata autoru budžetu, tok, pasasokūt myusu zīduotuojim, itaidu vareibu devem vēļ vairuokim autorim. Portalā lakuga.lv publicāti ari 20 literaturys pyrmpubliciejumi.
Ari itūgod asam sajāmuši kaidu atzineibu, i tei ir Vaļsts volūdys centra i Nacionaluos elektroniskūs plošsazinis leidzekļu padūmis reikuotuo Latvejis medeju volūdys bolva. Vaira par bolvu ITE.
Latgalīšu kulturys ziņu portalu lakuga.lv jau septeņpadsmit godu uztur Latgalīšu kulturys kusteiba “Volūda” (bīdreiba “LgSC”). Paļdis Sabīdreibys integracejis fondam, Vaļsts kulturkapitala fondam i Aizsardzeibys ministrejai par projektu konkursim, lai latgaliski varim dareit na tik šudiņ, tok ari reitu!
Lels paļdis ari vysim individualajim zīduotuojim i reklamys deviejim, kurūs atbolsts paleidzējs nūdrūsynuot portala darbeibu!
Itūgod portala redakceja sagataveja 472 rokstus, kas bez moksys daīmami portala arhivā ITE.
