Pīsadolom storptautiskā projektā ar mierki styprynuot latgalīšu volūdu
Bīdreiba “Latgolys Studentu centrs” īsasaistejuse storptautiskā projektā, kura mierkis ir styprynuot mozuoklītuotuos volūdys. Projektā leidzdorbojās pietnīki i volūdu aktivisti nu Eiropys i Amerikys. “Latgolys Studentu centra” mierkis sadarbeibā ar Oduma Mickeviča universitatis pietnīkim nu Pūlejis ir styprynuot latgalīšu volūdu Latvejā.
Eiropys Komisejis atbaļsteitais projekts “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (Minority Languages, Major Opportunities.
Collaborative Research, Community Engagement and Innovative Educational Tools — COLING) paredz styprynuot “mozuos” volūdys – tuos, kas nav golvonuo vaļsts volūda i kurys lītoj tikai daļa sabīdreibys.
Projekts fokusejās iz latgalīšu volūdu Latvejā, navatlu i cytom volūdom Meksikā, greko i griko volūdom Italejā, frīzu volūdu Nīderlandē. Projektā leidzdorbojās pietnīki i sabīdriskūs organizaceju puorstuovi nu Pūlejis, Nīderlandis, Italejis i Latvejis, kai ari sadarbeibys partneri nu ASV i Meksikys. Latveju projektā puorstuov bīdreiba “Latgolys Studentu centrs”, kas jau daudzus godus eistynoj aktivitatis latgalīšu volūdys saglobuošonai, atteisteibai i populariziešonai.
Projekts snādz vareibu pietnīkim i volūdu aktivistim apsamaineit ar zynuošonom i kūpeigi struoduot pi ideju volūdys lītuotuoju skaita palelynuošonys i volūdu vuiceibu materialu sagataveišonys. Vosorys vydā “Latgolys Studentu centra” aktivistim beja vareiba īsapazeit ar frīzu volūdys sitaceju Nīderlandē.
Projekta rezultatā tiks izveiduota platforma interneta vidē, kurymā byus pīeimama informaceja par volūdu i kulturu daudzveideibu, vuiceibu materiali, īsacejumi volūdu apgivei, datorspēle volūdu apgivei, kai ari veikti akademiski pietejumi. Projekta ītvorūs izveiduota sātyslopa ltgnui.com. Tymā pīejami aizdavumi, materiali idejis, kas paliedz vuiceit i popularizēt latgalīšu rokstu volūdu školuos i kursūs.
Projekts teik eistynuots nu 2018. leidz 2021. godam. Vaira par projektu angļu volūdā var skaiteit sātyslopā colingproject.wordpress.com.