Nūtykušys pyrmuos divejis cykla “Latvīšu gruomotai 500. Fokusā Latgola” lekcejis
10. i 24. septembrī Latvejis Nacionalajā bibliotekā (LNB) aizvadeitys pyrmuos divejis lekcejis cyklā “Latvīšu gruomotai 500. Fokusā Latgola”, kū reikoj LNB i latgalīšu kulturys kusteiba “Volūda”. Lekcejis veļteitys Latgolys pietnīceibys i volūdys vaicuojumim – vītvuordim i muižu biblioteku kolekcejom.
Ūtardiņ, 10. septembrī, skanēja kartografis, nūvodpietneicys Andrys Zubko-Melnis stuosts “Latgales vietvārdi: vēsture, valoda un latgaliešu literatūra” par latgaliskūs vītvuordu viesturi, puormaiņom, problematiku i vītvuordu pasaruodeišonu literaturā.
Fotogalerejā: A. Zubko-Melnis lekceja LNB, foto Edeite Laime
Bet 24. septembrī LNB Letonikys i Baļtejis centra vadeituoja, viesturneica Kristīne Zaļuma stuosteja par muižu biblioteku kolekcejom kai olūtu Latgolys viesturis pietnīceibā.
Fotogalerejā: K. Zaļumys lekceja LNB, foto Edeite Laime
Kotrā nu lekceju kluotyn beja aptyvai 20 interesentu, kas piec lekcejis beigu aizdeve interesejūšūs vaicuojumus. Cytim grybātuojim byus vareiba lekcejis nūsaklauseit audio formatā LNB raidīrokstā, kas byus daīmams vāluok itūgod. Par tū viesteisim!
Lekceju cykla trešuo i nūslādzūšuo sasatikšona paradzāta 22. oktobrī, kod volūdneica Lideja Leikuma īpazeistynuos ar pyrmū laiceiguos literaturys dorbu latgaliski “Eisa muoceiba ap audziešonu bišu” (1832). Lekcejis apmekliejums ir bezmoksys.
Nūtikšonu cyklys “Latvīšu gruomotai 500” ir pīcu godu (2021–2025) programa, kurā teik izcalti svareiguokī procesi, kas īkustynuojuši latvīšu raksteituo i īspīstuo vuorda izaplateišonu. 2025. godā tiks atzeimuota pyrmuos īspīstuos latvīšu gruomotys – ļutaru miša – pīci symti godu. Lekceju cyklys ir Latvejis Nacionaluos bibliotekys i latgalīšu kulturys kusteibys “Volūda” kūpeiga ideja programā dagrīzt leluokys viereibys ari ūtrymā latvīšu volūdys rokstu tradicejā – latgalīšu volūdā – publicātajim dorbim i volūdys atteisteibai kai taidai, veicynojūt sabīdreibys izpratni, izgleituošonu i zynuošonu daīmameibu par Latgolu i latgalīšu volūdu.
Lekceju nūtikšonu atbolsta Sabīdreibys integracejis fonds nu Latvejis vaļsts budžeta daškiertūs Kulturys ministrejis leidzekļu projektā “Latgaliskuos kulturvidis styprynuošona: sadarbeiba, izpratne i īsaiste”.
