Nūtics NVO hakatons, kas veļteits organizaceju nūtureibai pret dezinformaceju
21. i 22 augustā Rēzeknis nūvodā treis navaļstiskuos organizacejis – Latvejis Platforma atteisteibys sadarbeibai LAPAS, latgalīšu kulturys kusteiba “Volūda” i Pasauļa Dobys Fonds –, organizēja diveju dīnu NVO ideju i sadarbeibys hakatonu, kab styprynuotu organizaceju nūtureibu pret dezinformaceju.
Divejuos aktivuos dīnuos, kuruos pīsadaleja NVO puorstuovi nu vysaidu organizaceju (naskaitūt organizatorus, nu taidu organizaceju kai: Latvejis Dobys fonds, Cyta Daugovpiļs, Zaļuo breiveiba, Latvejis Zemnīku federaceja, Latvejis Lauku forums, Dia+Logs, Grybu paleidzēt bēglim) vairuoku lektoru vadeibā dalejuos pīredzē, struoduoju dorba grupuos, kluasejuos ekspertu lekcejuos, kai ari struoduoja pi kūpeigys kampanis pret dezinformaceju idejis.
Pyrmajā dīnā, 21. augustā, ap dezinformaceju, ar tū saisteitim vaicuojumim i sovu dorbu īpazeistynuoja Re: Baltica puorstuove, faktu puorbaudeituoja Evita Puriņa. Ar sovim pīmārim, kai saīs sasadūrt ar muoņu viestim i dezinformaceju, pasadaleja LAPAS, PDF i “Volūdys” puorstuovi. Taipat vysi hakatona daleibnīki kūpā diskutēja i analizēja, kai dezinformaceja var ītekmēt NVO darbeibu – kai izaruodeja, vaicuojumi, kū skaita par problematiskim, lelai daļai organizaceju ir leidzeigi, nasaverūt iz sferu, kaidā teik struoduots.
Hakatona ūtrei dīna beja veļteita, kab kūpā struoduotu pi socialūs medeju kampanis plānuošonys, kurys golvonais aizdavums byutu paleidzēt mazynuot dezinformacejis riskus, kas potenciali var skart kotru NVO, kai ari palelinuot NVO atpazeistameibu sabīdreibā. Ar lekceju par dezinformacejis lūmu komunikacejā i marketingā hakatonā pīsadaleja marketinga i reklamys eksperts, zeimynu atteisteituojs Raimonds Platacis. Raimonda vadeibā topa ari kampanis rodūšuos idejis, kuruos byutu dezinformacejai veļteituos kampanis daļa voi kai cytaiž varātu nūderēt dorbā, stuostūt par NVO lūmu sabīdreibā.
Hakatons nūtyka digitaluo aktivisma akseleratora programys projektā, kurū atbolsta TechSoup Global teiklys, Hive Mind globaluo vuiceišonuos platforma, Baļtejis Medeju izcileibys centrys i Google.
Fotogalerejā – biļdis nu hakatona, foto Amanda Anusāne.
