Nūskaidruoti fotokonkursa “PieZīmes/PīZeimis/JūrõTǟtõkst” uzvarātuoji
Sveicīni Vaļsts volūdys dīnā! Kai īprīšk sūleits, šudiņ paviestejam fotokonkursa “PieZīmes/PīZeimis/JūrõTǟtõkst” uzvarātuojus. Fotokonkursā, kuru reikuoja latgalīšu kulturys kusteiba “Volūda”, Latvejis Nacionalais kulturys centrs i Latvejis Universitatis (LU) Lībīšu instituts interesenti tyka aicynuoti īmyužynuot jaunuos latvīšu viesturyskūs zemu rūbežu i latgalīšu rokstu i lībīšu volūdā izlyktuos vītvuordu zeimis.
Apkūpuots žurejis, kurā pīsadaleja pa puorstuovam nu konkursa reikuotuojim, kai ari nūsaslēdzs publikys simpatejis bolsuojums, leidza ar tū:
- Foto kolažu uzvarātuoji: Ieva ar “Mierlinkizt” nūmetnis daleibnīku i Dzintra ar Cyblys pamatškolys latgalīšu rokstu volūdys puļceņa jaunuokuos grupys daleibnīku biļžu kolažom. Eipaši sveicīni i pateiceiba kai Ievai, tai Dzintrai par ceņteibu biļžu īsyuteišonā!
- Rodūšuos biļdis uzvarātuoji: Baiba (Melnsila upe/Mustanum joug) i Marija (Varkļuoni)
- Fotomontaža – Līga (Mežavydu fotomontaža, ari leluokuo FB bolsuotuoju simpateja)
- Simpateju bolvys nu Latgolys Turysma asociacejis sajims Līga par Mežavydu fotomontažu i Cyblys pamatškolys audziekni par aktivū Cyblys apleicīnis vītvuordu izzynuošonu.
- Žurejis simpateju bolvys par aktivitati, rodūšumu voi zeimu stuostu sajam: Ievys īsyuteituo školuotuoja Reiņa biļde (Mazirbe/Irē), Lauris (ar Preiļu nūvoda nūruodis prīceigū video), Iveta (par sešu biļžu kolažu), Aija (ar jaunajim Preiļu nūvoda četrkuojainajim dzeivuotuojim), Madara (par atraktivū Latgolys rūbeža nūruodis biļdi), Inga (par dzejiskū nūskaņu rudinī), Ilze (par volūdu tyltu pi nūruodis Kolka/Kūolka) i Irēna (par nūsaukumu kolekceju i konkursa atbaļsteišonu).
- Latgalīšu kulturys ziņu portala lakuga.lv Facebook bolsuojuma simpateju bolvys sajims ari: Sandija (ar Latviešu Stiglava/Latvīšu Styglova), Elīna (Mazirbe/Irē), Artūrs (Mērdzene/Mērdzine), kai ari Cyblys pamatškolys latgalīsu rokstu volūdys puļceņa vacuokuos grupys daleibnīki i školuotuojis Dzintrys audzynomuo klase.
Paļdis par aktivū pīsadaleišonu! Par bolvu sajimšonu ar uzvarātuojim i puorejūs simpateju bolvu sajiemiejim sasazynuosim e-postā. Vysys konkursa biļdis var apsavērt ITE.
Atguodynojam, ka fotokonkursa nūsaukumā “PīZeimis/PieZīmes/JūrõTǟtõkst” simboliski sasavyn vuordi “piezīmes” i “pie zīmes” (latgaliski “pīzeimis” i “pī zeimis” (pī – Zīmeļlatgolys izlūksnēs), lībiski – “pīzeimis”), aicynojūt konkursa daleibnīkus fotografētīs pošim i rodūši izapaust, īmyužynojūt latvīšu viesturyskūs zemu rūbežu i vītvuordu nūruodis. Latvīšu viesturyskūs zemu rūbežu i apdzeivuotūs vītu nūruodis lībīšu i latgalīšu rokstu volūdā atbiļstūši Latvīšu viesturyskūs zemu lykumā nūsaceitajam gar vaļsts autocelim suoce pastateit pārnejuo gods rudinī. Pastateituos zeimis sabīdreibā sajāmušys kai prīcu i atbolstu, tai naizpratni i nūraidūšu atsatīkšonu par zeimu vītu i jamuos paruodeitajom volūdom. Aiz tuo fotokonkursa reikuotuoji tur nūceju, ka itaids aicynuojums dagrīzs sabīdreibys viereibu zeimem i reizē rūsynuos izzynuot Latvejis namaterialū kulturys montuojumu, vītejūs dzeivuotuoju volūdu i Latvejis identitatis elementus. Kai daudzi jau īvāruojuši, niu ir vaļsts leluokūs ceļu ir pastateitys vaira nakai 50 viesturyskūs zemu rūbežu nūruodis (Latgale, Zemgale, Kurzeme, Vidzeme, Sēlija), kai ari vaira nakai 300 vītvuordu nūruodis latgalīšu rokstu volūdā Latgolā i vaira nakai 30 – Lībīšu krostā lībīšu volūdā.
Īmyužynuot latvīšu viesturyskūs zemu rūbežu i vītvuordu nūruodis latgaliski i lībiski aicynuoja fotokonkursa reikuotuoji – latgalīšu kulturys kusteiba “Volūda”, Latvejis Nacionalais kulturys centrs, LU Lībīšu instituts, kai ari atbaļsteituoji Latgolys turisma asociaceja i latgalīšu kulturys ziņu portals lakuga.lv. Aktivitati finansiali atbolsta Sabīdreibys integracejis fonds nu Latvejis vaļsts budžeta daškiertūs Kulturys ministrejis leidzekļu projektā “Latgaliskuos kulturvidis styprynuošona: sadarbeiba, izpratne i īsaiste”.
