Nūsaslāgušys jaunīšu Latgolys izzynuošonys programys “LTG tu dū!” pyrmuo gods aktivitatis
Catūrtdiņ, 14. decembrī, leidza ar sasatikšonu ar reklamys specialistu, uzjiemieju Raimondu Plataci nūsaslēdze Latgolys izzynuošonys programys “LTG tu dū!” pyrmuo gods jaunīšu aktivitatis.
Reklamys specialists, uzjiemiejs i zeimyna “Latgalactica” atteisteituojs Raimonds Platacis “LTG tu dū!” jaunīšim i kluotyn asūšajim latgalīšu kulturys kusteibys “Volūda” kustynuotuojim stuosteja par myusdīneigu ar Latgolys saisteitu zeimynu idejom i tapšonu, atzeimojūt, kur i kaidā veidā zeimynūs veiksmeigi var izmontuot sadarbeibys ar cytim uzjāmumim, latgalīšu volūdu, vuordu spēlis, regiona sovpateibys, kai ari ar vizualajim elementim padareit spūdruoku zeimynu stuostu.
Sasatikšonys ūtrajā daļā jaunīšu izaugsmis i Latgolys izzynuošonys programys “LTG tu dū!” koordinatori i jaunīši izvērtēja programys pyrmuo goda darbeibu, veiksmeiguos lītys i kū varātu dareit cytaižuok. Aprelī “LTG tu dū!” aizasuoce ar programys atkluošonu i gūdeigū diskuseju par tū, kam taidam juobyut, kab jaunīši grybātu dzeivuot Latgolā, bet turpynuojuos ar kluotīnis i attuolynuotom sasatikšonom, vuicūtīs raksteit latgaliski, izzynojūt par sovom lideru prasmem, pīdzeivojūt latgaliskū Rēzeknē Latgolys Kulturviesturis muzejā i sasatikšonā ar “Ausmeņa Kebabs” saiminīku Valteru Murānu, testejūt spēli “Latgalīšu volūdai draudzeiga vīta – ite Rēzekne!”, pīsadolūt grafiti darbneicā, laivuošonā i raidejuma “Pīci breinumi” sarunā ap Latgolys turismu kūpā ar Latgolys Turisma asociacejis koordinatori i ari myusu kustynuotuoju Lauru Spunderi, gastejūt pi Latgolys deputatim Saeimā, repojūt kūpā ar Ūgu voi īsajiutūt apdzīduotuoju lūmā kūpā ar folklorys kūpu “Rūtoj” i “Turki” vadeituojom, kai ari īsadvesmojūt nu reklamys specialista, zeimynu atteisteituoja i uzjiemieja Raimonda Platača, kai radeit myusdīneigu Latgolys tālu. Programā pīsadaleja vaira nakai 20 dalinīku, pīsadolūt naviņ programys nūdarbeibuos i aktivitatēs, bet ari dorūt aizdavumus eipaši sataiseitajā programys “LTG tu dū!” WhatsApp grupā – meklejūt latgaliskū vidē, īsasaistūt kotra programys dalinīka dzimšonys dīnys miniešonys spēlēs, kai ari atsasaucūt aicynuojumam pīsadaleit cytūs “Volūdys” pasuokumūs voi pīduovuojumūs.
Jaunīši atzineigi vērtēja programys saturu, tok golvonais sacynuojums beja, ka efektivuoks veids vys tik ir intensivs vairuoku dīnu seminars, kurā vysa jaunīšu viereiba ir vierzeita taišni seminara saturam i uzmaneibu nanūvierš kasdīnys aizdavumi. Jaunīši izsaceja vēlmi, ka cytugod otkon tyktu sareikuos seminars “Atzolys”, kas intensivā vairuoku dīnu dorbā dūd vareibu cīši daudz izzynuot par latgalīšu kulturu, tuos procesim, īsasaisteišonys īspiejom, kai ari sasatikšonu ar cytim jaunīšim. Vairuoki jaunīši atzyna, ka aktivuoku pīsadaleišonu “LTG tu dū!” gryutuoku padareja nūtikšonys vysaiduos vītuos, bet attuolynuotuos nūdarbeibys na vysod bejušys kotram ārtā laikā voi ari vaļdejs kūpejs sagurums nu attuolynuotys formys vuiceibom kai taidom. Kai veiksmeigais faktors tyka izcalta nūdarbeibu dažaideiba i tūs īspiejis, nūvārtāta vareiba izzynuot latgalīšu rokstu volūdu, paraudzeit jaunys prasmis, kai ari sasatikt ar latgaliskuos kulturvidis personeibom, pīdzeivuot koč kū pyrmū reizi. Ka 2024. godā tyktu taiseits seminars, “LTG tu dū!” jaunīši pīkryta, ka lobpruot īsasaisteitu seminara plānuošonā i dorbūs naviņ kai daleibnīki, bet ari dorba grupā pyrma tuo kai breivpruoteigī.
Programys nūslāgumā jaunīšim tyka izsludynuots projektu konkurss, kura uzvarātuojs, kas byus īsnēdzs sovu ideju i tuos pamatuojumu, dabuos īspieju itū ideju – sapynu – eistynuot, “Volūdys” komandai kai mentorim paleidzūt kai idejis, tai tehniskajā i publicitatis dorbā. Konkursa mierkis – dūt platformu jaunīšu ideju eistynuošonai i kluotyn pīredzi projektu sagataveišonā, eistynuošonā i padareituo populariziešonā, kas kai zynuošonys nūderēs ari piečuok sevkurā dorba sferā.
Jaunīšu izaugsmis i Latgolys izzynuošonys programa “LTG tu dū!” ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
