“LTG tu dū!” jaunīši tīšsaistē vuicejuos latgalīšu rokstu volūdu
Latgalīšu kulturys kusteiba “Volūda” 18. majā reikuoja tīšsaistis nūdarbeibu par latgalīšu rokstu volūdu, kurā beja aicynuoti pīsadaleit Latgolys izzynuošonys i jaunīšu izaugsmis programys “LTG tu dū!” daleibnīki i kusteibys aktivisti. Nūdarbeibu vadeja volūdneica i latgalīšu rokstu volūdys specialiste Muora Mortuzāne-Muravska.
Nūdarbeibā tyka runuots par latgalīšu rokstu volūdys pareizraksteibys pamatlītom – plotūs i šaurūs e, ē lītuošonu, leidzskaņu meisktynuošonu, i, y raksteibu, atgrīzeniskūs darbeibys vuordu i lītvuordu formu pareizraksteibu, eipašeibys vuordu lūceišonu i c.
Kab puorbaudeitu sovys zynuošonys, pēc nūdarbeibys jaunīši varēja aizpiļdeit latgalīšu rokstu volūdys testu, kas vysim interesentim ir daīmams sovu zynuošonu puorbaudei Latgalīšu kulturys ziņu portalā ITE.
Latgalīšu rokstu volūdys pareizraksteibys vuiceibu materiali i video daīmami vysim Latgalīšu kulturys ziņu portalā ITE, latgalīšu pareizraksteibys nūsacejumi daīmami ITE.
Cyta “LTG tu dū!” programys aktivitate ir kluotīnis sasatikšona 4. junī Rēzeknē, kurys laikā jaunīši gasteis Latgolys kulturyviesturis muzejā, sasatiks ar “Ausmeņa Kebabs” saiminīku Valteru Murānu i testēs latgalīšu volūdai draudzeigūs vītu spēli Rēzeknē.
Programa ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
