Lideru eipašeibys i Latgolys īspiejis – pyrmuos “LTG tu dū!” nūdarbeibys temys
Latgolys kongresa dīnā, 27. aprelī, latgalīšu kulturys kusteiba “Volūda” aicynuoja Latgolys izzynuošonys i jaunīšu izaugsmis programys “LTG tu dū!” daleibnīkus – 22 jaunīšus nu dažaidu Latvejis vītu – pīsadaleit tīšsaistis nūdarbeibā “Es Latgolā – Latgola manī”, kurys laikā tyka runuots par liderisma prasmem i Latgolys atteisteibys īspiejom i izaicynojumim.
Pyrmū tīšsaistis nūdarbeibu vadeja latgalīšu kulturys kusteibys “Volūda” aktiviste, karjerys konsultante i “LTG tu dū!” programys koordinatore Dagneja Dudarjonoka. Pyrmajā nūdarbeibā, pīsaturūt pi dūmys, ka myusu laikūs kotram pošam juobyun lideram sev, cīši veiksmeigi iz dzeivis pīmāra par nūblūdiejušu ekskursantu grupu, kūpā ar jaunīšim tyka saraksteitys svareiguokuos lidera prasmis – īdvesmuošonu, atbiļdeibu, energiskumu, dareišonu, sovu i cytu vierteibys apsazynuošonu, vareibu orientētīs situacejuos i c.
Programys dorba burtneicuos, kū jaunīši sajēme “LTG tu dū!” atkluošonys reizē, ituos nūdarbeibys laikā jaunīši aizpiļdeja aizdavumu par tū, kaidys liderisma prasmis ir jim pošim i kaidys itūs apvuiceibu laikā grybātu vaira atteisteit sevī. Par vysim tyka raudzeits ar klasiskuos SVID analizis paleidzeibu vaira padūmuot ari par Latgolys kai regiona atteisteibu. Dagneja stuosta: “Jaunīši eipaši atzeimēja, ka Latgolys vierteiba ir kultura, volūda i cylvāki. Tok taipoš i sacynuojom, ka pīrūbežs var byut kai vuojuo puse, tai i kai īspieja, pīvadumam, turisma nūzarē. Taipoš cīši svareigi ir ari reali viertīs iz situaceju, ka myusu palīk mozuok i raudzeit tymā vaicuot jaunis īspiejis. Itī vaicojumi radeja lobys diskusejis, kurys nūslēdzem ar sarunom par tū, kū varim poši dareit sovys vītys cīma, pogosta, piļsātys i Latgolys atteisteibai i kas mums pošim ir svareigi.”
Niu, 18. majā, jaunīši tīšsaistē vuiceisīs latgalīšu rokstu volūdys pamatus latgalīšu rokstu volūdys ekspertis Muorys Mortuzānis-Muravskys vadeibā, a piečuok 4. junī kluotīnē Rēzeknē programys jaunīšim byus sova veida latgaliskais pīdzeivuojums Rēzeknē – īsavieršona Latgolys kulturyviesturis muzeja “orūdūs”, kas globoj latgaliskuos vierteibys i Latgolys stuostus, sasatikšona ar vīnu nu latgalīšu alternativuos kulturys personeibu, “Ausmeņa Kebabs” saiminīku Valteru Murānu, izzynojūt kai par latgaliskū hiphopa i grafiti kulturu, tai i uzjiemiejdarbeibu regionā i īsadreikstiešonu struoduot uorpus tuo. Taipat “LTG tu dū!” jaunīšim byus vareiba vīnim nu pyrmūs izspēlēt latgalīšu volūdai draudzeigūs vītu aktivū spēli Rēzeknē.
Programa ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
