Latvejis Radeja pyrmatskaņuos četru myusu dīnu latgalīšu autoru stuostu radejis skaitejumus
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja, raidejuma “Ielūdz Radioteātris” laikā kotru vokoru 22.05 stuņdēs Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins Lukaševičs, Raibīs (Oskars Orlovs) i Egita Kancāne. Dorbus radejis skaitejumu formā īdzeivynuojuši akteri Juoņs Krūņs, Katrīna Griga, Inga Misāne-Grasberga i īrokstu muokslinīcyskais vadeituojs, kai ari vīns nu bolsu – Kristaps Rasims.
“Var saceit, ka Latvejis Radejis Latgolys studeja uzajāmuse sova veida miseju – īmyužynuot myusu dīnu latgalīšu literaturys procesus i pošus literarūs dorbus, kū asam veiksmeigi darejuši kai ar raidīrokstu “Puslopys”, kura 27 serejuos īmyužynuotys sarunys ar literatim i dorbu skaniešona pošu autoru skaitejumā, tai i da ituo taiseitajim literarūs dorbu īrokstim. Bet “Volūda”, izdūdūt literarūs dorbus, publicejūt jaundorbus i organizejūt literarūs konkursus, veicynoj latgalīšu literaturys populariziešonu i turpynuošonūs. Salīkūt kūpā spākus i pīredzi, asam atroduši veidu, kaidā literatura latgaliski laikūs, kod latgaliski skaita viņ rešais, var turpynuot sasnēgt arviņ jaunu auditoreju i reizē padareit vysaiduoku Latvejis Radejis radejis teatra boguoteigai īmyužynuotūs literarūs dorbu pīduovuojumu,” soka Latgolys studejis vadeituoja i īroksta producente Renāte Lazdiņa.
Myusu dīnu latgalīšu prozys daīmameibu radejis skaitejumu veidā 2021. godā Latvejis Radejis Latgolys multimedeju studeja i latgalīšu kulturys kusteiba “Volūda” (bīdreiba “LgSC”) aizsuoce ar Ilzis Spergys stuostu kruojuma “Dzeiveiba” radejis skaitejumim, pārņ, 2023. godā, “Ielūdz radioteātris” izskanēja Alda Bukša kriminalromana “Bruoli” radejis īstudiejums. Obeji dorbi nūvārtāti kai ar klauseituoju atzineibu, tai i Latgalīšu kulturys goda bolvys “Boņuks” sajimšonu.
Turpynojūt myusu dīnu latgalīšu literaturys īpazeišonu, topuši jauni radejis skaitejumi “Stuosti latgaliski”, kurūs Annelis Slišānis stuosti nu kruojuma “Tuoraga stuosti” diveju daļu skanēs aktrisis Ingys Misānis-Grasbergys bolsā, Valentina Lukaševiča esejis nu izdavuma “Casnāgu maizeitis” skaiteis Kristaps Rasims, Egitys Kancānis stuostu kruojuma “Syltuo mola” pīdzeivuojumus izdzeivuos aktrise Katrīna Griga, bet Raibuo (Oskara Orlova) stuostus nu kruojumu “Pyrma syltī” i “Zalta tesmini” skaiteis akters Juoņs Krūņs. Prozys dorbi vess ceļā iz Latgolys syltuokū molu, ļaus dzeivi paraudzeit casnāgu maizeitēs i bīzuopīna gryudūs, aicynuos smītīs, skumt i turpynuot vaicuot.
Radejis skaitejumu “Stuosti latgaliski” pyrmatskaņuojums nu 21. da 24. maja Latvejis Radejis 1 eterā izskanēs “Ielūdz radioteātris” laikā kotru vokoru 22.05 stuņdēs, skanūt vīna autoru dorbu izlasei. 21. majā pyrmatskaņuojums byus Annelis Slišānis stuostim, 22. majā – Egitys Kancānis stuostim, 23. majā – Valentina Lukaševiča esejom, bet myusu dīnu latgalīšu literaturys skaniešonys nedeļu 24. majā nūslēgs Raibuo stuostu “Ceremoneja” i “Demo” radejis skaitejumi. Piečuok dorbus varēs sevkurā laikā nūsaklauseit Latvejis radejis sātyslopys sadaļā “Radioteātris” voi radejis mobilajā lītuotnē.
Latgalīšu literaturys radejis skaitejumus taisa Latvejis Radejis Latgolys multimedeju studeja, sasadorbojūt ar latgalīšu kulturys kusteibu “Volūda” i īrokstu studeju “Reiga”, dorba muokslinīcyskais vadeituojs ir Kristaps Rasims, īroksta producente Renāte Lazdiņa, bet projekta vadeituoja Edeite Laime.
Latgalīšu kulturys kusteiba “Volūda” soka lelu paļdis kotram, kurs atsasauce aicynuojumam ari individuali atbaļsteit itūs radejis skaitejumu tapšonu.
