Latgolys vierteibys muzejā i alternativuos kulturys stuosti – “LTG tu dū!” Rēzeknis pīdzeivuojums
Latgalīšu kulturys kusteiba “Volūda” 4. junī reikuoja kluotīnis sasatikšonu Latgolys izzynuošonys i jaunīšu izaugsmis programys “LTG tu dū!” jaunīšim. Dīna suocēs ar ekskurseju Latgolys kulturviesturis muzejā, kab izzynuotu, kaidus duorgumus i zynuošonys muzejs globoj taišni par Latgolu, tok turpynuojuos ar pušdīņom “Ausmeņa kebabs” kūpā ar latgaliskuos alternativuos kulturys svareigu personeibu, kebabneicys saiminīku Valteru Murānu.
Latgolys kulturviesturis muzejā gids Vladislavs Malahovskis jaunīšus izvede cauri ekspozicejai “Rēzekne laikmetu griežos” – piļsatys viesture septeņūs godu symtūs, leluokajai Latgolys keramikai veļteitajai ekspozicejai, kai ari īpazeistynuoja i izstuosteja vaira par Latgolys kongresa symtgadei veļteitū izstuodi „Pāri slieksnim”.
Piečuok sarunā ar Valteru Murānu, kurs ir kebabneicys “Ausmeņa Kebabs” saiminīks, kai ari “Ausmeņa Records” grafiti muokslinīks i hiphoperis, jaunīši izzynuoja, kai i kū jis ir darejs latgaliski hip-hop i grafiti sferā ar “Ausmeņa Records”, par juo gaitom kebabu biznesā, školys laiku i juo pūdnīku dzymtys saknem.
Vosorā “LTG tu dū!” programys jaunīšim ir paradzāta praktiska īsasaisteišona “Volūda” vosorys aktivitatēs, tymā vydā ari latgalīšu volūdai draudzeigūs vītu spēlis Rēzeknē puorbaudeišonā i uzlobuošonā.
Programa ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
