Latgolys Studentu centrs –> LgSC –> ?
Itūšaļt bīdreiba “LgSC” eistynoj Aktivūs īdzeivuotuoju fonda atbaļsteitū projektu kapacitatis ceļšonai. Vīns nu īmesļu pīsadaleit projektu konkursā beja motivaceja i vareiba struoduot ar bīdreibys zeimynu i ar tū saisteitajim īškejim bīdreibys vaicuojumim.
Bīdreibai “LgSC”, kurei īprīšk beja zynoma kai “Latgolys Studentu centrs”, ir senejis idejiskuos saknis, nu oficiali kai bīdreiba pīregistrāta 2005. godā. Nu tuo laika vaira voi mozuok aktivs bejs bīdreibys dorbs izvierzeitūs mierku sasnēgšonai. 2020. godā bīdreiba pamaineja nūsaukumu nu “Latgolys Studentu centrs” iz abriviaturu “LgSC”, kaida bīdreibys apzeimiešonai sabīdreibā tai i tyka kasdīnā lītuota. Aiz kuo tys dareits? Sovulaik bīdreibys aktivisti eistyn vaira beja jaunīši i studenti, nu reizē ar bīdreibu ari jī pīauga, nanūtyka tik aktiva paaudžu maiņa i pasameja ari bīdreibys dorbuošonuos veidi, vierīņs i interesis. Tys vyss nūvede pi vaicuojuma, voi “studentu” vēļ arviņ ir “studentu”, jo padareitais i mierki seņ jau beja puorauguši nūsaceitū “studentu” leimini.
Voi abriviatura “LgSC” ir lobuokais atrastais rysynuojums? Bīdreibys ituo breiža vadeituoja Edeite Husare soka: “Dūmys par tū, voi vēļ arviņ asam “studentu centrs” beja seņ, aiz tuo ari oficiali atsasaceit nu studentu byušonys ruodejuos logiskys sūļs i taipat vysur tykom saukti par “LgSC”. Nu niu saīt sasaskart ar tū sabīdreibys daļu, kas nazyna bīdreibys viesturi, agruokū nūsaukumu i abriviatura raisa vaicuojumus, kas tod tys ir. Ituo izaicynuojuma rysynuošonu tod redzējom ari kai vīnu nu sūlim bīdreibys kapacitatis styprynuošonā – saprast i atrast bīdreibys zeimynu i publiskū tālu, kas vaira naraiseitu vaicuojumus ni sovā vydā, ni apleik. Pamatā jau dorbi i gribiešona dareit nu nūsaukuma pameišonys nasamaina, nu myusu dīnuos styprys zeimyns ir ari daļa nu kasdīnys publicitatis i veids, kai sabīdreibai skaidri paruodeit, kas tod bīdreiba ir i kū dora.”
Jau kaidu šaļti bīdreiba kai individualuos sarunuos, tai ari grupys diskusejuos, struodojūt kūpā ar vīnu nu Latvejis lobuokūs reklamys specialistu Raimondu Plataci, eistynoj zeimyna atjaunuošonys dorbus. Raimonds Platacis itam dorbam tyka uzrunuots aiz tuo, ka pādejā laikā juo interešu vydā jo eipaši ir Latgola i latgaliskais, kas par reizi ari saeisynoj laiku, skaidrojūt regiona, seviški volūdys, sovpateibu, kas nanūlīdzami vys tik ir svareiga taišni “LgSC” dorbā. Tyvuokā laikā bīdreiba vaicuos ari sabīdreibys īsaisti i redzīni par bīdreibys uztveri, kas paleidzēs zeimyna izstruodē.
Leidza ar bīdreibys zeimynu pasameis ari organizacejis vizualuo identitate, dabojūt myusdīneigu veidūlu i veicynojūt bīdreibys atpazeistameibu i skaidruoku vizualū volūdu, taipat tiks izstruoduotys vizualūs marketinga materialu sagatavis, kas ītaupeis laiku i resursus bīdreibys komunikacejis plana esitynuošonā iz prīšku.
Nu 2021. goda 1. maja da 2022. goda 30. apreļa bīdreiba “LgSC” eistynoj projektu “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”. Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja. Sajimtais atbolsts 19 994,87 €. Vaira par projektu var izzynuot ite: https://lgsc.lv/aktivus-idzeivuotuoju-fonds/.
