Latgolys Studentu centram jau 7 godi!

Jau itū nedeļu 2. novembrī vīna nu aktivuokajom i pazeistamuokajom Latgolys jaunīšu organizacejom – „Latgolys Studentu centrs” – svinēs sovu 7. dzimšonys dīnu. Tei ir jaunīšu kūpa, kurā kotrs ir ar sovu skatejumu par Latgolu, juos kulturu i nuokūtnis īspiejom, bet vysim ir vīna kūpeja ideja – tū vysu atteisteit i paruodeit puorejai Latvejai i pasauļam. Bīdreibys panuokumu atslāga ir darbeibys vierīņs, puordrūšu, troku i reizem pat naīspiejamu ideju eistynuošona.

Leidz oficialys bīdreibys nūdybynuošonai 2005. godā Latgolys entuziasti dorbuojuos kai draugu i interesentu kūpys, bet aktivuokī i uzjiemeiguokī jaunīši saprota, ka var vaira i ar leluoku vierīni. Turkluot byušona juridiskā organizacejā deve īspieju sovys idejis puorvērst projektu pīteikumūs i īsnīgt projektu konkursūs, taidā veidā dabojūt finansialu atbolstu. Jaunīši apsazynuoja, ka ir napīcīšams sabīdreibai i pošim sev (latgalīšim) atguodynuot par Latgolys boguotū kulturu i viesturi, volūdys unikalitati un sovdabeibu, taidā veidā veicynojūt pīdereibys i lapnuma izjiutys veiduošonūs par dzymtū pusi i Latveju.

LgSC pa 7 darbeibys godim ir realiziejs daudz i dažaidus projektus i pasuokumus. Nav taida latgalīša, kurš nabyutu dzierdiejs par LgSC dorbim, varbyut pat nimoz nazynūt, ka paveiktais ir taišni „Latgolys Studentu centra” aktivistu nūpalns.

Šūbreid LgSC dorbojās 4 studentu piļsātuos – Reigā, Jelgovā, Daugovpilī i Rēzeknē. Par tū, lai nu vuiceibom breivajā laikā, jaunīši varātu saīt vīnkūpus, ryupejās kotrys piļsātys biroja vadeituojs, pīduovojūt izklaidis i atpyutys pasuokumus latgaliskā gaisūtnē.

Jaunīšu motivaceja byušonai bīdreibā ir dažaida, vīnam tei ļaun sasajust tyvuok sātai (Latgolai), lobuok izprast sevi, cytam tei ir īspieja sasarunuot latgaliski i par Latgolu, īspieja rodūši izapaust i realizēt sovys īceris, īgiut jaunys prasmis i pīredzi. Tūmār pats svareiguokais byušonai LgSC ir kūpeibys sajiuta, kas ļaun apsazynuot sovu izceļsmi i volūdys boguoteibu, tei ir pīdereiba sova veida mafejai, i, prūtams, golvonais, kas vysus vīnoj, ir mīlesteiba pret Latgolu.

Svātku gaisūtnē pīduovojam īsavērt LgSC arhivā – puors biļdis nu darbeibys pošim suokumim.