“Latgolys prozys skaitejumi 2022” aicynuos nūstuot literaturā dzeļžaceļa stacejā “Rēzekne II”
Itei nedeļa ir storptautyskuo literaturys festivala “Prozas lasījumi” nūtikšonys laiks, kurā catūrtdiņ, 8. decembrī, pusdeveņūs vokorā kluotīnē i tīšraidē varēs pīdzeivuot konkursa “Latgolys prozys skaitejumi 2022” nūslāguma pasuokumu. Konkursa nūslāgums byus kai nūstuošona i pasaglobšona literaturā dzeļžaceļa stacejā “Rēzekne II”, bet tuo tīšraide byus nūsaverama portalā lakuga.lv, latgalīšu kulturys kusteibys “Volūda” i festivala “Prozas lasījumi” lopuos socialajā teiklā “Facebook”.
Kab veicynuotu literarū procesu Latgolā i latgaliski raksteitūs tekstu radeišonu Latvejā, jau trešū reizi bīdreiba “LgSC” izsludynuoja konkursu “Latgolys prozys skaitejumi 2022”. Konkursā beja aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu. “Latgolys prozys skaitejumūs 2022”, kurūs devize itūgod beja “Kur ir muna sāta?”, aicynojūt autorus pīsavērst pīdareibys, puormaiņu i mekliejumu vaicuojumim, tyka sajimti 16 dažaidu autoru dorbi kai latvīšu literarajā, tai latgalīšu rokstu volūdā. Konkursam dorbus īsyutejuši Latgolys kulturtelpā jau zynomi autori, kai ari taidi, par kurim publiski vēļ nikas nabeja dzierdāts. Īsyuteitūs dorbus viertēja žureja, kurā beja literaturzynuotneica Ilga Šuplinska, literaturzynuotneica i Latvejis Universitatis Humanitarūs zynuotņu fakultatis profesore Ieva Kalniņa, Bolvu Centraluos bibliotekys vadeituoja Ruta Cibule i rakstneica i redaktore Jana Egle.
Konkursa nūslāgums, iz kuru kluotīnē voi tīšraidē aicynuots kotrys grybātuojs, byus pīdzeivojams catūrtdiņ, 8. decembrī, 20.30 Rēzeknē, dzeļžaceļa stacejā “Rēzekne II” voi tīšraidē latgalīšu kulturys ziņu portalā lakuga.lv, kai ari latgalīšu kulturys kusteibys “Volūda” i storptautyskuo festivala “Prozas lasījumi” lopuos socialajā teiklā “Facebook”. Pasuokumu kluotīnē nūsaverams bez īīšonys moksys. Konkursa nūslāgumā pīsadaleis treis lobuokī ituo gods konkursa daleibnīki, pasuokumu vadeis Rēzeknis Tautys teatra akters Juoņs Pampe, bet prozys skaitejumus papyldynuos folklorys ansambļa “Gosti”, kurā apsavīnuojuši Juoņa Ivanova Rēzeknis muzykys vydsškolys audziekni, uzastuošona. Konkursa uzvarātuoju dorbus piečuok varēs puorskaiteit i video formatā nūsavērt portalā lakuga.lv, bet lobuokuo dorba autors svātdiņ, 11. decembrī, pīsadaleis storptautyskuo literaturys festivala “Prozas lasījumi” nūslāguma pasuokumā Reigā.
“Latgolys prozys skaitejumi 2022” nūslāguma nūtikšonu taisa latgalīšu kulturys kusteiba “Volūda” (bīdreiba “LgSC”), bet pasuokuma režisore ir Amanda Anusāne, kura par nūtikšonys īceri stuosta: “Staceju kai prozys skaiteišonys vītu itūgod asam izavēlējuši, sasasaucūt ar festivala “Prozas lasījumi” temu par patvārumu i “Latgolys prozys skaitejumu” aicynuojumu dūmuot par sātu i pīdareibu – staceja daudzim nu mums ir pādejuo pītura pyrma ceļa voi pyrmuo piec atsagrīzšonys, taipat dīvamžāļ niu Ukrainā dažaida veida stacejis ir patvārums nu Krīvejis raideitūs rakešu trīcīnim. Itūreiz gribim staceju “Rēzekne II” pīpiļdeit ar mīru caur literaturu i tuos autoru bolsim. Taipat jo eipaši aicynojam tūs, kuri tikū byus izkuopuši nu viļcīņa “Reiga-Zylupe” naskrīt par reizi iz sātu, bet vēļ nūstuot i pasaklauseit latgalīšu prozys dorbus tūs autoru skaitejumā.”
“Latgolys prozys skaitejumi 2022” nūslāguma pasuokumā varēs na viņ izzynuot ituo gods konkursa uzvarātuoju, nu tuo apmaklātuojim byus vareiba ar kaidu zīduojumu atbaļsteit bīdreibys “Tavi draugi” dorbu iz Latgolys rūbeža – rūbeža kontrolis punktūs Grebņovā, Terehovā i Silenē, ciļvieceiguokūs apstuokļūs sagaidūt ukraiņu biegļus.
Taipat pasuokuma laikā saguojušajim byus vareiba apsavērt muokslineicys Gitys Palmys, kurei muokslys aprynduos zynoma kai “viļcīņu meitine” vīna vokora gleznu izstuodi ar viļcīnim golvonajuos muokslys dorbu lūmuos.
Konkursa nūtikšonu 2022. godā atbolsta storptautyskais literaturys festivals “Prozas lasījumi 2022”, Vaļsts kulturkapitala fonds, AS “Latvijas dzelzceļš”, latgalīšu kulturys ziņu portals lakuga.lv i žurnals “Domuzīme”.