Latgalīšu volūdys i kulturys kursu “Vosoruošona 2023” programa
Nu 30. juļa da 3. augusta Rēzeknis nūvoda Rogovkā byus latgalīšu volūdys i kulturys vosorys kursi “Vosoruošona 2023”. Pīsadaleišonai kursūs dasasacejuši latgalīšu volūdys i kulturys interesenti (asūšī i tūpūšī školuotuoji i cytu sferu puorstuovi) kai nu Latgolys, tai cytu Latvejis vītu, kuri kursūs padzilinuos zynuošonys par latgalīšu rokstu volūdu, latgalīšu literaturu i kulturu kai taidu.
Vosorys kursu reikuotuoji – Latgalīšu volūdys, literaturys i kulturviesturis školuotuoju asociaceja i latgalīšu kulturys kusteiba “Volūda” – pīduovoj īpasazeit ar vosorys kursu “Vosoruošona 2023” programu, kurā ir paradzātys na viņ nūdarbeibys kursu daleibnīkim, bet ari vokoru pasuokumi i nūslāguma diskuseja, kurūs var pīsadaleit ari cyti interesenti. Programa daīmama zam roksta.
Kursu nūdarbeibom paradzāts vysā intensivs grafiks i tuos sadaleitys treis blokūs – nūdarbeibys ap latgalīšu rokstu volūdu, nūdarbeibys ap latgalīšu literaturu i cytim kulturys aspektim, kai ari cytys aktivitatis (rodūšuos darbneicys, vokora nūtikšonys, ekskursejis), kas paleidzēs vaira izzynuot myusu dīnu latgalīšu kulturu.
Ituo gods kursūs nūdarbeibys vadeis volūdneicys Muora Mortuzāne-Muravska, Lideja Leikuma, Nikole Naua, publiskuos runys pasnīdziejis Māra Liniņa i Aina Matīsa, literaturzynuotnīki Ilga Šuplinska i Valentins Lukaševičs, Latvejis Radejis Latgolys multimedeju studejis vadeituoja Renāte Lazdiņa, folklorys pietneica Angelika Juško-Štekele i cyti, kai ari ar pīredzi da ituo, vuicūt latgalīšu rokstu volūdu, pasadaleis školuotuojis Annele Slišāne, Ineta Misāne, Laila Budreviča. Kursu pamata mierkis itūgod ir paleidzēt latgalīšu volūdys školuotuojim lobuok sasagataveit jaunajam vuiceibu godam, tok nūdarbeibys byus nūdareigys ari cyti sferu latgalīšu volūdys i kulturys interesentim.
Taipat, ka ir kaids interesents, kurs gryb pīsavīnuot ituo gods vosoruotuojim, kursūs vēļ ir daīmamys puora vītys. Dasasaceit var, aizpyldūt anke (da 25. juļa) ite: ej.uz/vosoruosona2023.
Vosorys kursi “Vosoruošona” pyrmū reizi nūtyka 2000. godā, itūgod tei byus jau 14. “Vosoruošonys” sasatikšona. Latgalīšu volūdys i kulturys kursus “Vosoruošona 2023” reikoj Latgalīšu volūdys, literaturys i kulturviesturis školuotuoju asociaceja (LVLKŠA), latgalīšu kulturys kusteiba “Volūda” (bīdreiba “LgSC”) i Nautrānu vydsškola.
Vaira dasacejumu gadīnī prīškrūka byus latgalīšu rokstu volūdys školuotuojim, kuri jau vuica volūdu školā voi plānoj tū dareit tyvuokajā laikā. Ar precizu kursu programu byus vareiba īpasazeit juļa vydā. Piec kursu nūslāguma tūs daleibnīki sajims bet piec kursu beiguos dalinīki sajims 36 stuņžu aplīceibu. Kursu leidzmoksuojums nu daleibnīka itūgod ir 30,00 eiro. Leidzmoksuojums paradzāts dalejis ādynuošonys izmoksu segšonai. Kursu četru pylnu dīnnakšu saturu ar lektorim i nūtikšonom, naktssātu i ūtru daļu ādynuošonys (vysmoz treis reizis dīnā) sadz kursu reikuotuoji i atbaļsteituoji.
Nūtikšonu finansiali atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, Latvīšu volūdys agentura, Rēzeknis nūvoda pošvaļdeiba i Nautrānu apvīneibys puorvaļde, kai ari Eiropys Savīneibys pietnīceibys i inovacejis pamatprograma “Apvārsnis 2020” saskaņā ar Marejis Sklodovskys-Kirī dotaceju Nr. 778384. Kursi nūteik projektā “Mozuok lītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki (COLING Nr. 778384)”.