Latgalīšu volūda i medejprateiba. Nūtykuse pyrmuo nūdarbeiba Ludzys nūvoda bibliotekā
Maja vydā, 16. majā, latgalīšu kulturys kusteibys “Volūda” uzturātuo latgalīšu kulturys ziņu portala lakuga.lv redakcejis puorstuovis Laura Melne i Edeite Laime gasteja Ludzys nūvoda bibliotekā, bibliotekarim pīduovojūt nūdarbeibu ap latgalīšu rokstu volūdu i tuos izmontuošonu medejprateibys temā, vaira seve pasorgojūt ditigalajā pasaulī.
Nūdarbeibā, kas beja daļa nu kotra mieneša bibliotekaru dorba seminara, pīsadaleja vaira nakai 25 Ludzys nūvoda bibliotekari. Divejis stuņdis garuos nūdarbeibys pyrmajā daļā beja vareiba vaira izzynuot par latgalīšu volūdys raksteibys pamatim, piļdeit aizdavumus i saprast atškireibys runuotuos i raksteituos volūdys vydā, bet ūtrajā daļā izzynuot par medejprateibu car latgalīšu volūdys i pyrmajā daļā dabuotūs zynuošonu prizmu – kai, izmontojūt mozuoklītuotuos volūdys, seve vaira pasorguot škārsteikla vidē, kam dagrīzt viereibys, radzūt viests – medejūs voi e-postu sarakstē – latgaliski.
Portala lakuga.lv redaktore Laura Melne soka: “Cīši prīcojamīs par Ludzys nūvoda bibliotekaru atsauceibu i interesi, aktivū pīsadaleišonu nūdarbeibā i viereigū aizdavumu piļdeišonu, kū iz prīšku varēsim papyldynuot ari ar jūs īsacejumim. Taipat turim nūceju, ka ituos zynuošonys bibliotekarim nūderēs publiskajā saziņā latgaliski – gatavejūt afišys, par biblioteku dorbu viestejūt socialajūs teiklūs.” Latgalīšu kulturys kusteibys “Volūda” vadeituoja Edeite Laime papyldynoj, ka ap medejprateibu myusu dīnuos teik runuots daudzi, ari bibliotekari i bibliotekys ir vīni nu tūs, kas regulari par jū stuosta i izgleitoj sabīdreibu. “Bet, atsateistūt myusu dīnu tehnologejom i ari latgalīšu volūdai īīmūt tamuos, leidza īt ari vysaidi izaicynuojumi i īspiejis, kur mozuoklītuotuos volūdys, kaida ir ari latgalīšu volūda, var paleidzēt vēļ vaira seve pasorguot, byut drūsuokim par publicātū informaceju. Digitaluo aktivisma akseleratora programā kai “Volūda” sasatykom ar CERT.LV digitaluos drūseibys ekspertu, kas i mums pošim ļuove lobuok saprast, kai var izmontuot latgalīšu volūdu digitaluos drūseibys styprynuošonā, deļtuo prīcojamīs, ka varim ituos idejis stuosteit tuoļuok,” soka Edeite.
Sasatikšona ar Ludzys nūvoda bibliotekarim beja pyrmuo nu treju nūdarbeibu, kū latgalīšu kulturys kusteiba “Volūda” pīduovuoja digitaluo aktivisma akseleratora programys projektā, kurū atbolsta TechSoup Global teiklys, Hive Mind globaluo vuiceišonuos platforma, Baļtejis Medeju izcileibys centrys i Google.
Ka vēļ kaidys Latgolys nūvodu bibliotekys voi cytys organizacejis grybātu nūsaklauseit nūdarbeibu, drūsai var pīsasaceit, rokstūt vasals@voluda.lv, vīnojūtīs par īspiejom i laiku. Nūdarbeiba teik pīduovuota bezmoksys, ilgums ir divejis stuņdis, teik nūdrūsynuoti vysi praktiskuos dalis materiali. Nūdarbeibai juonūteik da oktobra vyds i vālams, lai tamā pīsadola vysmoz 20 interesenti. Taidu vareibu cikom “Volūda” var pīduovuot vēļ divejom reizem, deļtuo interesenti aicynuoti pīsasaceit aiz laika.
Fotogalerejā: latgalīšu volūdys i medejprateibys nūdarbeiba Ludzys nūvoda bibliotekā, foto Edeite Laime i Laura Melne
