Latgalīšu vokors Reigā ar “Ceidarim”

Trešdiņ, 24. majā, 19.00 iz sasatikšonu kulturys nomā “Atmoda” aicynuoti Reigys latgalīši i jūs draugi, kab pīdzeivuotu vokoru sova laika literari-muzykalūs nūtikšonu tradicejis “LaLaDra – latgalīts latgalīšam draugs” stylā. Muzykali prīcēs folklorys kūpa “Ceidari”, kai ari grybātuoji varēs paraudzeit golda spēlis “Čipierkstneits” veiksmis i zynuošonu izaicynuojumu.

Itūreiz “LaLaDra” sasatikšona vaira muzykala – ar sova 10 godu jubileja īskandynuošonu vokoru prīceiguoku padareis latgalīšu kulturys kusteibys “Volūda” folklorys kūpa “Ceidari”, eipaši gūdā ceļūt Bierzpiļs pusis dzīsmis, tok naiztiks ari bez pošu folklorys kūpys dzīduotuoju meiluokūs dzīšmu. Taišni pyrma 10 godu, 2013. gods 21. majā”, Reigā dzeivojūšī latgalīši sasatyka iz pyrmū dzīduošonys reizi ar vīnkuoršu dūmu padzīduot i paplašynuot dzīšmu repertuaru. Nu ituos idejis roduos “Ceidari”.

Sasatikt ar sovejim, īpasazeit ar vēļ naīpazeitajim, apsarunuot, pasaklauseit, sadzīduot leidza, kai ari pi kaida nu gaļdeņu saspēlēt golda spēli “Čipierkstneits” voi vīnkuorši prīceigi pavadeit vokoru bez kaidu nūsacejumu aicynuots sevkurs latgalīts i latgalīšu draugs, kuram 24. majā saīt byut Reigā.

Īīšona bezmoksys. Kulturys noma “Atmoda” adrese: Stobu īla 10 k-4, Reiga.