Latgalīšu kulturys ziņu portalam – 16 godu!
Vosorys vyds ir laiks, kod dzimšonys dīnu svietej “Volūdys” uzturātais latgalīšu kulturys ziņu portals lakuga.lv. Tys oficiali tyka palaists reizē ar 2007. gods festivalu “Muzykys skrytuļs” – 14. julī, koč i jau da tuo portala radeituojs Jurs Viļums beja raudzejs savuok nalelu rokstu bāzi, kab īsuokums nabyutu nu “boltys lopys”. Svātku 16. vosorā pīduovojam vareibu vaira īpasazeit ar portala komandu.
Pi suokūtnejuo nūsaukuma LaKuGa – latgalīšu kulturys gazeta – “vaineigs” ir literats, literaturzynuotnīks i portala rokstu autors Valentins Lukaševičs, bet servera “sātu” deve Latgolys regiona atteisteibys agentura/Latgolys plānuošonys regions, pi kurūs vēļ arviņ var atrast pošus pyrmūs rokstus.
Cik reižu itūs godu laikā ir bejušys situacejis, kod portala darbeiba nūstuoj i ruodīs, ka spāki golā, tok atsarūn kaids dareituojs, kab vys tik napasadūtu. Portala, kura saiminīks ir latgalīšu kulturys kusteiba “Volūda” (bīdreiba “LgSC”), redaktori itūs godu laikā bejuši Jurs Viļums, Edeite Laime, Vineta Vilcāne, Laura Melne i Sandra Ūdre, pi tuo lelā daļā laika tys bejs viņ breivpruoteigais dorbs.
Niu aiz portala kasdīnā stuov Laura Melne, Edeite Laime, Laura Spundere, Marta Puzāka i Amanda Anusāne, iz vysom dolūt treis pylnys slūdzis i apvīnojūt redaktora, korektora, žurnalista, socialūs teiklu redaktora, fotografa, projektu vadeituoja, šopera, konsultanta i cytus dorbus. Ar kotru nu komandys lūcekļu vaira īpasazeit drupeit tuoļuok iz prīšku.
Var saceit, ka niu, sagaidūt tūs sovus 16, lakuga.lv ir piļneigi cytaids nakai romantiskajā suokumā i styprys kai nikod – mums ir stabila komanda, kas godā var radeit vaira nakai 500 rokstu, daudz moz skaidrys atbolsts da 2024. gods gola. Portals rauga byut aktivs socialajūs teiklūs (tūs daudzumu goda laikā pat navar izskaiteit) i sekuot leidza medeju lauka tendencem, atbaļsteit latgaliskuos nūtikšonys i pošim byut tūs iniciatorim, sasadorbuot ar cytim medejim, īstuodem i organizacejom, tok pats golvonais – byut vīta, kur var izzynuot vysu jaunuokū, kas nūteik latgaliskajā kulturā pasaulī.
Kai gribīs portalu atbaļsteit iz prīšku, tū var dareit vairuokūs veidūs:
- skaiteit kasdīnā i sekuot leidza socialajūs teiklūs (Instagram, Facebook, TikTok, Twitter);
- syuteit viests par nūtikšonom i jaunumim iz info@lakuga.lv;
- pīsavīnuot portala uorštata autorim (vaira informacejis ITE);
- atbaļsteit ar zīduojumu, kab vys tik mozuokys ryupis par tū, kai īs iz prīšku, voi byus projektu konkursi, kurūs meklēt atbolsta, atbaļsteit var ITE.
Paļdis vysim skaiteituojim, rokstu autorim, sadarbeibys partnerim, leidza sekuotuojim, kritikim i atbaļsteituojim! Myusu leluokais sapyns ir, kab kaidu dīnu mes vaira navarātu saceit, ka lakuga.lv vēļ arviņ ir vīneigais medejs pasaulī, kurs kotru dīnu saturu roda tikai latgaliski. Kod taida dīna daīs, zynuosim, ka latgalīšu volūda eistyn aug!
Lels paļdis par atbostu Vaļsts kulturkapitala fondam i Sabīdreibys integracejis fonda i Kulturys ministrejis Medeju atbolsta fondam par tū, ka varim byut i ka vīnai nu pasauļa rešuok lītuotūs volūdu ir pošim sovs medejs.
Laura Melne. Portala redaktore i korektore.
Laurys roksti i sarunys ar kulturys ļaudim līk aizadūmuot, nūsapyust, apsaprīcuot i dzeivuot leidza – tik pamateigi tī ir. Kai redaktore Laura naļaus portalam nūsagrīzt nu īdūmuotuo ceļa, liks maut dziļuok, kod tuo prīškā īsatruops kaids jaunūs ideju azars, i atguodynuos, ka Latgolys rūbeži nasabeidz leidza ar viesturiskuos zemis kartē īzeimuotajim, ka juosatīc i juosaver plotuok – tī pasaulī! Ari latgaliskuos nūtikšonys nu vysa pasauļa Laura pacīteigi kuortoj portala kalendara ailēs. Ar Lauru var runuot i diskutēt par latgalīšu rokstu volūdu, tok jei vysod paliks demokratiska i atvārta puorsameišonai, jo ar myusu volūdu jei pīdzymuse, izauguse i dzeivuojuse. Laura nasabeist izlikt sev jaunus izaicynuojumus, meklēt interesantū tī, kur vaira nav juos komforta zona. Ari raksteišonā jei napalīk tik lakuga.lv rūbežūs, bet sovu reizi ļaunās žurnalu “A12”, “I’mperfekt”, raidejuma “Kolnasāta” i cytu puslopom, slejom i skaņu failim. Itūgod sovā virpulī Lauru īruovuse ari pyrmuo latgalīšu komiksa “Sunāns breiveibā” nūtikšonu viertine, i mes par tū asam dyžan lapni!
Amanda Anusāne. Socialūs teiklu redaktore i fotografe.
Ka sekojit leidza portala socialūs teiklu īrokstim, tod aiz leluokuos dalis nu tūs byus Amanda. Jei car fotoaparata i telepona “aci” sagius šmukuokūs i dokumentaluokūs kadrus i sajiutys, sataiseis izzynūšuokūs i stuostūšuokūs rīlus i tiktokus. Ka vajadzēs raksteit, pīraksteis, ka vajadzēs braukt, brauks, ka vajadzēs lēkt jaunūs izaicynuojumūs – lēks! Amanda nasabeist dareit i byut nūtikšonu vydā, bet vysam, kū jei dora kluotyn vysod byus kvalitate i ciļvieceibys sajiuta. Kod Amandys dīnys parādā nav lakuga.lv dorbu, tod ir latgalīšu kulturys kusteibys “Volūda” nūtikšonys, Latvejis Radejis Latgolys studejis “Pīcu breinumu” produciešona, kaids “Pīna goldu viestnīceibys” stuosts i varbyut kaida pasamierciešona soltā azara iudinī.
Laura Spundere. Žurnaliste.
Redakcejā navarim saprast, kod Laura atsapyuš, jo juos kasdīna paīt, dūmojūt i ryupejūtīs par turismu Latgolā Latgolys turisma asociacejā i jo eipaši vosorā, īmūt Latgolys “Azaru stygys” garajūs puorguojīņūs, tok vokori i breivuos šaļts teik Latgolys kulturvidis problemrokstim i kasdīnys viestim portalā. Kod ir kaids nūskaidrojams vaicuojums, Laura byus tei, kas nasabeis vaicuot, praseit i par reizi dabuot atbiļdis. Latgolys kulturys personeibu portretūs jei vuordūs sazeimuos vysu piļneiguokuos biļdis. Laura ari byus tei, kas kai kasdīnys bolsts styprynuos ar kaidu lobu vuordu, nūvērss dūmys ar jūku, atguodynuos par pošim sovu vierteibu i kai taida feja pasaryupēs, kab portala dorbu pamona ari cyti, dasokūt rokstus i padareitū kaidūs konkursūs voi apbolvuojumūs. Dreižs ir naviņ Laurys suņs, bet dorbūs i jei poša!
Marta Puzāka. Žurnaliste.
Portala komandai pīsavīnuojuse iz vysa naseņuok, tok itymā laikā juos stuosti ir drūsmeigi vaduši myus car Ukrainys i ukraiņu ceinis atbolsta i Latgolys pīrūbeža cīmu celim, jei dasagivuse latgalīšu kulturvidis problemom i atkluojuse kulturys personeibu stuostus. Ka gribit izzynuot, kai dreiži var īsavuiceit labi raksteit latgaliski, vaicojit Martai! Mums nav švuorbu, ka par Martu sovā komandā prīcuotūs sevkura medeja komanda i varim byut lapni, ka niu tī asam mes (šaļtim gūdeigi pasadolam ari ar LSM.lv redakceju). Tok vysu vaira gribīs, kab Martys dorba celi iz prīšku navad nikur paceli nu Latgolys, jo tik kvalitativu žurnalistikys dorbu dareituojus i drūsmeigus nazynomajuos temuos lieciejus mums regionā eistyn cīši vajag!
Edeite Laime. Portala vadeituoja, žurnaliste i socialūs teiklu redaktore.
Edeitis ryupis ir, kab portals struodoj i dorbi vadās, kab ir īsnāgti projekti, nūdūtys atskaitis, kab sasnēgts rokstu i auditorejis skaita ruodeituojs, kab saorganizātys sadarbeibys, kab sataiseiti leigumi, aizsyuteiti riekini i vyss cyts, kū kasdīnā cik daudzi naradz. Redakcejis sapuļcēs Edeitis sinonims ir ideja – izdūmuos jaunu rokstu temys tai, ka ar skaudzi, kab gona dareit kuo vysai redakcejai, izdūmuos jaunus formatus i izaicynuojumus portalam, redzēs, kur var eistynuot kaidys īspiejis. Portala dorbūs Edeite ir žurnalists, jo eipaši, kod nazkas jauns pasaruodejs latgaliskuos muzykys laukā, ir korektors, kod juoīt tolkā Laurai, ir socialūs teiklu redaktors, kod vysu bīžuok nazkas juostuosta feisbukūs i tviterūs. Tok vysa cyta laika daļa jai paīt “Volūdys” projektu, aktivitašu i nūtikšonu vierzeišonā, sovu reizi dūmojūt par “Dzīšmu stuostim” raidejumam “Kolnasāta”, sovu reizi nazkū pīrokstūt ari žurnalam “A12” i, kod nu tuo vysa nūgurts, skrīnūt pa pļovu leidza kaidam nasagiunamam lepetnīkam.