Jaunu aiļu kruojumu atvieršonys svātki

Sastdiņ 16. aprelī 14 stuņdēs Reigā, gruomotneicā “Satori” (Luočplieša īlā 31) nūtyks Leigys Seikstys-Deksnis gruomotys-performancis  “Herbārijs aba sīna nikaida” i Valentina Lukaševiča aiļu kruojuma “Bolti burti” atvieršonys svātki.

Leiga Seiksta-Deksne (1973) ir ailineica i žurnaliste, kūpā ar Oskaru Seikstu sarakstejuse romanu “Reitišku mads” (2000), juos ailis publicātys kūpkruojumā “Pagrauda”, izdavumūs “Rēzeknis Viests”, “Luna” i cytur. Juos pyrmuo pastuoveigū aiļu gruomota „Herbārijs aba sīna nikaida” (Rēzekne: Vysa pravda, 2011) ir poligrafisks eksperiments: tei izdūta 5 eksemplarūs autoris rūkrokstā ar muokslenīka Eināra Dekšņa taiseitu uodys īsiejumu. Gruomotys nadaudzī eksemplari nūklivušs dažaiduos privatuos i publiskuos bibliotekuos Latgolā i Reigā, vīnu nu tim byus vareiba apsavērt pasuocīnī.

 

 

 

 

 

 

 

 

 

 

 

 

 

 

 

 

Valentins Lukaševičs (1968) ir ailinīks i literaturzynuotnīks, struodoj Daugovpiļs Universitatē. Kūpā ar Oskaru Seikstu sarakstiejs aiļu kruojumu „Seppuku iz saulis vādara” (1995) i romanu „Valerjana dzeive i redzīni” (1996). Izdūti juo aiļu kruojumi „Kuozynda” (2005) i „Vot taidi vot i batvini” (2006). Gruomota „Bolti burti” (Rēzekne: Latgolys kulturys centra izdevnīceiba, 2011) ir juo jaunuokais aiļu kruojums, kura izdūšonu atbalstejs ar VKKF.

 

 

 

 

 

 

 

 

 

 

 

 

 

 

 

 

 

 

 

 

 

 

 

Puors ailis īskotam nu jaunuos gruomotys:
“BOLTI BURTI”

* * *
Sataisēsim vuortus.
Mudri brauks kuozys.
Aizbrauce pa cytu celi.
Navā kū izdzert.
Byus juoīt pi Ļusis.
Piec ūtruo litreiša
Dzonuosim vystys.
Nu vīnys ustobys iz ūtru.
Zalis i dzaltonys.
A nazkur skaņ kuozys.
Nazkur aiz Maltys.

* * *
Es asmu klusuma cylvāks.
Maņ napateik daže ka putyni dzīd.

* * *
Trāpuos padīnuos
Siežu iz balkona ar čaji.

Nazkur auškā
Lomojuos jei ar jū.

Nazkur pa labi
Lej blīnus.

Kaids izmat benčiku.

Nu septeituo ci ostoituo.

Es īsadūmoju vieliešonūs.

Zvaigzne…

Zvaigzne ir eista.

Zvaigzne ir eista.

Jam nikod
Nasuopēs plauškys.

* * *
Ituo Dīveņa daudzi vairs nagrib
Partū ka jam
Napīteik laika ar vysim pasarunuot.
Piec mieneša nūlyktys jaunys vieliešonys.
Sociologiskuos appraseišonys ruoda
Ka elektorats nalosa
Dīva omota kandidatu
Saraksteitūs programu.

* * *
Daugova aprelī izīt nu krostim.
Upe, kas napalyka sirdī.
Iudins puori Jersikys kolnam.
Vacī cylvāki soka – „iz smierti”.

Nivīns napīmiņ, kod tys tai beja.
Nūnese vysys pierts.
Leluokuo daļa staiguos nateiri.
Dzedeņš nūkuop nu kolna lejā.

Iudins jam navaida barjera,
Piļs jam navaida cītums.
Īt, i izīt ūtrymā krostā –
Latgalīšu Naradzamais rakstnīks.

* * *
Pīcūs nu reita vosorā vēļ vysi guļ.
Saule ar dzaltonu flomasteru
Zeimej iz sīnom napīkluojeigumus.
Pļova Juoņu zuoļu pylna –
Selerejis i pasternaki.
Kod navā vairs nikaida satura
Palīk pruotā tikai fakti.

* * *
Meikulam sābri nūdadzynuoja veikalu.
Beja atpiercs nu kolhoza par pajom.
A Meikulam beja vysprecizuokī svori.
Tikai jis nivīnam tū nasacēja.

Sadaga burtneicys i makaroni.
Palyka nalela, smirdeiga kaudze.
Jis nivīnam nikod nastuostēja
Ka muoti… Par Mareju sauce.

* * *
Vakar nūlasieju sovu Nobeļa lekceju.
Publika nasaprota nivīna vuorda.
Vīns aizkūde ar šprotim, ūtrs ar persiku,
A meitinis tai i naizleida uorā nu muorka.
Vardivis jau daroda pi itim čudikim.
Reit svinēsim Baļzaka dzimšonys dīnu.
Taurini jau nasabeist nu skaļuos muzykys.
A peilem to kas – reit juos liduos iz Kīnu.

Obeji autori meili aicynoj vysus aiļu i latgalīšu literaturys interesentus iz gruomotu atvieršonys svātkim 16. aprelī!