LaLaDra „Sātā”
15. decemrī Daugavpils kopejneicā „Sāta” nūtyka LgSC reikuotais pasuocīņs „Latgalīts Latgalīšam Draugs” jeb LaLaDra, kura mierkis beja Adventa nūskaņuos puļcēt Daugavpiļs i apleicīnis literatus, muzykantus i cylvākus, kurim tys vyss ir tyvs.
15. decembrī, man kai studentam, kas izīt praksi LgSC Daugavpiļs birojā, beja īspieja pīsadaleit LgSC reikuotajā literari muzykalajā pasuocīnī „Latgalīts Latgalīšam Draugs” aba LaLaDra, kas nu jau ir LgSC tradiceja.
Itūreiz vysi interesenti tyka aicynuoti iz kopejneicu „Sāta”, kur ari atsarūn LgSC Daugavpiļs biroja telpys, lai Adventa nūskaņuos, draudzeigā kompanejā pavadeitu svātdīnys piecpušdīni. Gataveišonuos pasuocīņam nūtyka jau īprīkš – taisiejom puzurus nūformiejumam, tambūriejom snīgpuorslys i pogrobu tuoļuokojūs styurūs mekliejom kirbeišus, ar kurim apduovynuot drūsmeiguokūs runuotuojus i dzīduotuojus.
Pasuocīns nūritieja draudzeigā i naformalā nūskaņā. Īsuokumā vysi bejom drupeit kautreiguoki, bet kūpeiga pasiediešona i čaja kruška lyka atsabreivuot i sasajust kai sātā.
Pasuocīni īskandynuoja Laima, kura spieļuoja gitāru i dzīduoja gon tautā labi zynomys dzīsmis, gon sovu i draudzenis kūpeigi sacarātū dzīsmi. Taipat ar gitarys skaņom prīcieja Romāns Sladzis nu grupom „Dabasu Durovys” i „Ze Pikniks”, kurš myusu prīškā paspieja i sadzīduot sovys dzīsmis i nūspieļuot klasisku muzykys gobolu, gatavojūtīs muzykys školys eksamenam.
Sovuos dzejis ailēs daliejuos gon Zaiga Lāce, kura beja kūša kai ūga na tikai sovā izskotā, bet ari dzejā. Ligija, kura prota izskaidruot keidys ailis tūp pīaugūt. Jureits, kurš byudams Saeimys deputats atroda laiku mysim pīsabīdruot. Nu munys pusis, kompliments Jureišam, ka nasabeist sovā dzejā īlikt keidu smoguoku temu. Valentins Lukaševičs īsaroda vaira pasaklauseit īsuokumā, bet vāluok ari daliejuos ar sovim dorbim. Ari poša Dagnija, kas ir LaLaDra iniciatore, na tikai lasieja sovys ailis, bet ari pareklamieja Vuorkovys apleicīnis literatu dorbu kruojumu.
Tai kai Adventa laiks ir na tikai Zīmyssvātku gaideišonys, bet ari lobu dorbu laiks, LgSC kliva par mozim sorgengeleišim Sintijai Allei, sakruojūt naudeņu, lai Sintija varātu izaveseļuot. Ari poša Sintija beja kūpā ar myusim virtualā veidā, vāruoja pasuocīni caur skype videozvonu.
Gunta Nagle
Daugavpiļs birojs
