Lakuga.lv i ReTV ar izgleitojūšim videomaterialim kleidynuos mitus par aizsardzeibu
Nu 27. oktobra septenis svātdīnis piec kuortys latgalīšu kulturys ziņu portala lakuga.lv i ReTv socialajūs teiklūs i nu 2. novembra septenis sastdīnis piec kuortys ReTV kanalā iz reizis piec raidejuma “Prāta banka” 20.25 stuņdēs tiks puorraideita izgleitojūša eisūs raidejumu sereja “Drūss, vēļ drūsuoks – kleidynojam mitus par aizsardzeibu”.
Projekta golvonais mierkis ir apzynuot Latgolys dzeivuotuoju informieteibu par vaicuojumim, kas saisteiti ar aizsardzeibys nūzari. Taipoš ir daudz tikpat svareigu papyldu elementu – dezinformacejis apkaruošona, stereotipu lauzšona par sīvītis lūmu aizsardzeibys nūzarē, kai ari informacejis vuokšona par Latgolys dzeivuotuoju attīksmi pret vysaidim svareigim vaicuojumim. Eisūs raidejumu sereja “Drūss, vēļ drūsuoks – kleidynojam mitus par aizsardzeibu” pīduovos īskotu dažaiduos temuos – Latvejis uorejuo drūseiba, austrumu rūbeža nūstyprynuošona, gataveiba i reiceiba krizis situacejuos, pretesteiba Krīvejis propagandai, VAM školuos i cytūs svareigūs vaicuojumūs.
Raidejumi ir apmāram pīcys minutys gari. Tī īkļautys īlu intervejis ar Rēzeknis, Daugovpiļs, Ludzys, Kruoslovys i Preiļu dzeivuotuojim. Īlu intervejis ļaun saprast Latgolys dzeivuotuoju redzīni par nūteiktim aizsardzeibys i drūseibys vaicuojumim, kai ari apzynuot īspiejamūs dezinformacejis narativus. Tod sekoj interveja ar īriedni, ekspertu voi cytu ar temu saisteitu personu, kas kleidynoj mitus i snādz precizu informaceju par kaidu vaicuojumu. Video eisais formats i dinamiskums ir strategeja, kas paleidz nūturēt skateituoju viereibu i daīmamā veidā izskaidroj svareiguokūs vaļsts aizsardzeibys aspektus.
Projekta laikā teik intervāti taidi eksperti kai Latvejis uorlītu ministre Baiba Braže, Latvejis Transatlantiskuos organizacejis generalsekretare Sigita Struberga, Vaļsts kancelejis Strategiskuos komunikacejis koordinacejis nūdalis vadeituojs Rihards Bambals, cyti eksperti i puorstuovi.
Projekta iniciatore i producente Anželika Litvinoviča par projektu soka: “Jamūt vārā globalū tendeņci – cylvāku gribiešonu nūsavērst nu ziņu patiereņa – ir svareigi atrast inovativus veidus, kai pasnēgt informaceju par vaļsts drūseibys i nūtureibys vaicuojumim. Eisūs raidejumu cykla mierkis ir veicynuot Latgolys dzeivuotuoju interesi par aizsardzeibys i drūseibys nūzarē nūteikūšū, veicynuot izpratni par individualū i kolektivū atbiļdeibu. Saturs teik veiduots tai, lai byutu daīmams, kūduleigs i saistūšs. “Drūss, vēļ drūsuoks – kleidynojam mitus par aizsardzeibu” ir projekts, kas par prioritati izvierzej Latgolys dzeivuotuoju bažys i vaicuojumus par nūzari. Taidā veidā regiona dzeivuotuoji teik izgleituoti par vaicuojumim, kas ir eistyn aktuali.”
Vysi video materiali byus publiski daīmami portalā lakuga.lv i retv.lv, kai ari socialūs medeju platformuos, i tūs varēs izmontuot školuos i cytuos īstuodēs, kur vajag runuot par aizsardzeibys nūzarei aktualom temom.
Projekts veiduots sadarbeibā ar Aizsardzeibys ministreju, nu projektu konkursa “Atbolsts Latgolys informativuos telpas styprynuošonai” 2024. godam leidzfinansiejuma. Projektu realizej latgalīšu kulturys ziņu portals lakuga.lv sadarbeibā ar ReTV, projekta iniciatore ir žurnaliste Anželika Litvinoviča.
