Kas ir Volūda
Latgalīšu kulturys kusteiba “Volūda” (juridiski bīdreiba “Volūda” (īprīšk “LgSC”)) ir navaļstiska organizaceja, kas apvīnoj cylvākus, kurim ir svareigi saglobuot i atteisteit Latgolys i latgaliskū kulturtelpu, latgalīšu volūdu. Vysi organizacejis bīdri tū dora nu breiva pruota i deļtuo, ka jim tys ir svareigi. Organizacejis mierkis ir veicynuot latgalīšu volūdys i latgaliskuos kulturvidis saglobuošonu, populariziešonu i atteisteibu.
Bīdreiba registrāta 2005. gods 2. novembrī kai “Latgolys studentu centrs”, nu aktivi dorbuojusēs jau daudzi seņuok. 2022. godā beja daguojs laiks zeimyna maiņai, i iz prīšku bīdreiba dorbojās kai latgalīšu kulturys kusteiba “Volūda”. Jaunajā organizacejis identitatē asūšais grafiskais elements (viļneits) simbolizej kusteibu, vierzeibu iz prīšku, paruodūt ari myusu organizacejis dobu – byut aktivim, radeit i vierzeit arviņ jaunys iniciativys i dorbus latgaliskuos kulturtelpys atteisteibai, dažaiduošonai i īkustynuošonai.
“Volūda” ir 20. g.s. suoku latgalīšu studentu i jūs apvīneibu goreigais maņtinīks. Paguojušuo godu symta deviņdesmytajūs godūs Latgolys jaunīši suoka apsazynuot sovu latgaliskū izcelsmi, lepuotīs ar tū i izveiduo dūmubīdru kūpu. Organizieja dažaidus pasuokumus, pamozom suoka popularizēt latgaliskū i plašuokai sabīdreibai paruodeit, ka var lepuotīs i ir juosalepoj ar tū, ka esi latgalīts. Tika izdūta avīze “Graidi”, izguoja latgalīšu literatu kruojums “Pagdrauda”, tyka reikuoti kursi školuotuojim “Vosoruošona”, nūtyka sasatikšonys pi kaida sātā voi kaidā tukšā auditorejā, dzīsmis, daņči i braucīni ar stopim iz sātu voi kaidu pierti ci tolku Latgolā.
Nu tuo laika bīdreiba ar eisuokim i garuokim puortraukumim struoduoja Reigā, Rēzeknē, Daugovpilī, Jelgovā i cytur, kur beja jauni ļauds ar Latgolu sirdī. Ar puortraukumim deļtuo, ka tei ir jaunīšu organizaceja – mainuos paaudzis, ļauds beidz školys, suok struoduot, aizceļoj iz sātu Latgolā voi iz cytom zemem, apsaprecej, palīk par tāvim i muotem.
Kai juridiska organizaceja Latvejis Republikys Uzjāmumu registrā bīdreiba “Volūda” oficiali ir registrēta 2005. goda 2. novembrī. 2008. gods 16. julī bīdreiba dabova sabīdriskuo lobuma organizacejis statusu izgleiteibys veicynuošonā, kulturys veicynuošonā i pilsūniskuos sabīdreibys atteisteibā. Tys zeimoj, ka, dūdūt atspaidu bīdreibai i juos projektim, ikvīnam ir vareiba atbaļsteit organizaceju, kas veicynoj latgaliskuos pošapzinis paceļšonu i jaunuotnis interesi par regionalū identitati, Latgolys kulturvidi, ekonomiku i sabīdriskajim procesim, kai ari dabuot materialū lobumu, sajemūt nūdūkļu atlaidis.
Bīdreibys “Volūda” statuti:
Latvīšu literarajā volūdā Word doc. formatā; PDF formatā.