Jaunītis sapyns palīk par jaunu kulturviesturis izzynuošonys objektu Rēzeknis nūvodā
Juņa golā Rēzeknis nūvoda Rogovkā bejušajā krūga vītā, veikalā “Sils”, tyks atkluota vītejuos jaunītis Amandys Ludboržys izsepinēta ekspoziceja. Tei reizē ir jauns kulturviesturis, nūvodpietnīceibys i turysma objekts Rēzeknis nūvodā – stuosts par vītejuos apleicīnis krūgim. Ekspoziceja “Iz krūdzeņu gluds bej’ ceļš” iz prīšku paleidzēs kai vītejim, tai ceļuotuojim izzynuot kai krūgu, tai Nautrānu pogosta viesturi, kai ari īpazeit īvārojamu Latgolys kulturviesturis personeibu dzeivis faktus.
Jaunuos ekspozicejis idejis autore ir vītejuo jaunīte Amanda Ludborža, kurei īsasaisteja latgalīšu kulturys kusteibys “Volūda” Latgolys izzynuošonys i jaunīšu izaugsmis programā “LTG tu dū!” i ar programys atbolstu eistynuoja sapynu par vizuali radzamu vītejuos apleicīnis krūgu stuostu. Ideja par krūgu pieteišonu jaunītei roduos, pasateicūt vacuokim, kuri niu jau treisdesmit godu puorvolda sātu Rogovkys centrā – vacajā krūga vītā. Amandys vacuoki piec Latvejis naatkareibys atjaunuošonys uzrunuoja veikala eipašnīku atjaunuot āku, kurā niu atsarūn puortykys i saimisteibys preču veikals “Sils” i ari jaunuo ekspoziceja. Amanda stuosta: “Rogovkys krūgam, koč i dadzynuots i kara laikā nūbombardāts, pasasokūt izdeveigajai atsarasšonys vītai, vystik ir pasaveics. Tys vēļ arviņ ir svareigu ceļu krystā i ari niu gaida ļauds, pīmāram, piec miša bazneicā. Ka agruok ļauds guoja īdzert kaidu ols skrūzi, niu īt piec produktu kasdīnai.” Leidza ar cytom Rogovkai svareigom jubilejom (225 godi nu Rogovkys suokšonuos, kod 1799. godā te izcalta pyrmuo kūka bazneica, kai ari 110 godu nu tagadejuos Nautrānu Romys katuoļu bazneicys pasvieteišonys 1914. godā), atzeimejams gods ir ari taišni Rogovkys krūgam – paīt 205 godi nu 1819. gods, kod tys izcalts kai pyrmais i leluokais vītejais krūgs.
Ekspoziceja “Iz krūdzeņu gluds bej’ ceļš” viestej par sovulaik Zaļmuižys muižkunga Nikolaja Paulina fon Rozenšilda caltajim voi puorvaļdeitajim krūgim. Jamā apkūpuoti stuosti ap desmit apleicīnis krūgu – Kapiņu, Kristiņku, Calmu, Rekļa, Kosteļa, Rogovkys, Ostrānu, Ciskovys, Bliseņu i Mičuru krūgim. Vysi krūgi bejuši vierteiga vītejuos apleicīnis daļa ar sovim viesturiskajim faktim i stuostim. Par pīmāru, Kapiņu krūgs, kas atsarads pi Ičys upis, bejuse vīta meža struodnīkim, kurī pa Iču plyudynuojuši baļčus, bet Bliseņu krūgā sovulaik saiminīkuojuse latgalīšu literata, presis darbinīka Konstantina Krusta (Nautra) saime.
Kai ruoda līceibys, sovulaik krūgu funkceja bejuse daudzi plotuoka nakai itūšaļt varbyut īrosts dūmuot. Jī beja pyrmuos vīsneicys, kuruos celinīki varēja atsapyust poši i palaist atpyutā zyrgus, īsastyprynuot, krūgi beja ari sasatikšonys vītys i kulturvītys, bet ar laiku, atsateistūt alkohola ražuošonai i tierdznīceibai, saprūtams, plotuoks palyka izklaidis aspeks. Leidzeigi kai cytuos vītuos, ari Nautrānu pusis krūgu sātys ir ar vysaidim liktinim – juos palykušys par dzeivojamajom sātom, veikalim, cytu funkceju ākom, taipat lela daļa guojuse būjā i da myusu dīnu kuormi nav sasaglobuojuši voi palykušs tik myuri. Nūvodpietnīks Ontons Miglinīks, kurs ekspozicejis tapšonā paleidzēja ar informaceju i fotografejom, juos atkluošonā nūruodeja, ka krūgi pamatā tyka calti caryskuos Krīvejis laikā – muižinīkim jī beja izdeveigi kai peļneišonys olūts. Tuo laika školuos nabeja ļauts runuot latvyski (myusu dīnu izpratnē – latgaliski), bet krūgā varēja runuot sevkurā volūdā, jī bejuši vīta, kur sasatikt, slēgt leigumus i dareit kuo cyta.
“Iz krūdzeņu gluds bej’ ceļš” idejis i koncepcejis autore ir Amanda Ludborža, dizaina autore Liāna Merņaka-Ņikitina, ar informaceju, dorbim i padūmim paleidziejuši: Ontons Miglinīks, Ludboržu saime, Edeite Laime, Andra Zubko-Melne, Ingūna Elere, Mārīte Zubko i Nautrānu Nūvodpietnīceibys muzejs. Jaunuo vītejuos kulturviesturis objekta radeituoji tur nūceju, ka jis radeis iņteresi atīt iz veikalu, kab vaira izzynuotu taišni Rogovkys i juos apleicīnis viesturi. Stuostu ap krūgim kotrys interesents var izpieteit veikala “Sils” dorbalaikā kotru dīnu nu 8.00 da 18.00. Pi ekspozicejis var dabuot postkarti, kurys ūtrā pusē ir aizdavum-meikle, jū var atrysynuot, viereigi puorskaitūt ekspozicejis stuostu. Taipat ekspozicejis autore aicynoj daleitīs ar sevkuru informaceju i biļdem, kas līcynoj par vītejuos apleicīnis krūgim i ar laiku var paleidzēt papyldynuot ekspoziceju.
Jaunuo objekta tapšonu finansiala atbaļsteja Rēzeknis nūvoda pošvaļdeibys latgaliskuos identitatis projektu programa, kai ari jaunīšu izaugsmis i Latgolys izzynuošonys programa “LTG tu dū!”, kurū latgalīšu kulturys kusteiba “Volūda” eistynoj ar Sabīdreibys integracejis fonda atbolstu nu Kulturys ministrejis daškiertūs Latvejis vaļsts budžeta leidzekļu.
Fotogalerejā: jaunuo kulturviesturis izzynuošonys objekta atkluošona Rogovkā, foto Amanda Anusāne
