Izdūts latgalīšu volūdys pošvuiceibys materials

Bīdreiba “Latgolys Studentu centrs” sagatavejuse latgalīšu rokstu volūdys pošvuiceibys materialu, kas byus lobs paleigs sevkuram latgaliski raksteit grybātuojam.

Latgalīšu rokstu volūdys prasšonys izkūpšona ir byutiska volūdys saglobuošonā i tuoluokā atteisteibā. Īspiejis kluotīne īsavuiceit latgalīšu rokstu volūdu ir cīši īrūbežuotys, partū raksteit grybātuojim naatlīk nikas cyts, kai tū dareit pošvuiceibys ceļā.

“Latgolys Studentu centrs” jau vairuoku godu gorumā eistynoj projektus ar mierki veicynuot raksteitprasmi i latgalīšu volūdys saglobuošonu, i, kab turpynuotu īsuoktū dorbu, bīdreiba eistynuojuse projektu “Vuicīs raksteit latgaliski kūpā ar LaKuGu!” ar bīdreibys “LR” finansialu atbolstu.

“Vīns nu veidim, kai nūdrūsynuot piec īspiejis leluokai auditorejai īspieju īsavuiceit latgalīšu rokstu volūdu, ir izveiduot datikšonu pošvuiceibys materialim internetā, taidā veidā ļaunūt raksteit grybātuojim pareizraksteibys nūsacejumus īsavuiceit sev vālamā vītā i laikā,” par projekta vajadzeibu stuosta tuo vadeituoja Vineta Vilcāne.

Pošvuiceibys materials “Vuicīs raksteit latgaliski!” byus nūdereigs gon jaunīšim kasdīnys saziņā, gon ari Latgolys kulturys i sabīdryskajim darbinīkim kasdīnys dorbā, kai ari vysim, kurim ir svareigi prast pareizi raksteit latgaliski. Apvuiceibu materials paradzāts īsuociejim, bet byus nūdereigs zynuošonu atsvaidzynuošonai ari tim, kas jau roksta latgaliski.

Kūpumā materialā īkļautys ostonis nūdarbeibys, kotru nu tom veļtejūt sovai(-om) temai(-om). Teoreju papyldynoj praktiski aizdavumi i tim pīvīnuotuos atbiļdis, kas ļaus puorbaudeit, voi teoreja ir īsavuiceita pareizi. Materials sagataveits, bolstūtīs iz Latvejis Republikys Tīslītu ministrejis 2007. godā apstyprynuotajim Latgalīšu pareizraksteibys nūsacejumim. Pošvuiceibys materialu sagatavejuse ilggadeja latgalīšu tekstu korektore Muora Mortuzāne-Muravska.

Bezmoksys materials pīejams Latgalīšu kulturys ziņu portalā www.lakuga.lv sadaļā “Raksteiba”, ar materialu var īsapazeit ite. “Latgalīšu Kulturys Gazeta” (LaKuGa) aba portals www.lakuga.lv latgalīšu volūdā viestej par latgaliskom nūtikšonom Latgolā i pasaulī.

Informaceju sagataveja:
Projekta “Vuicīs raksteit latgaliski kūpā ar LaKuGu!”
vadeituoja Vineta Vilcāne
vineta@lgsc.lv
T. 26149207
www.lakuga.lv