Īskaņuotys 15 jaunys latgalīšu klausompuosokys
Latvejis Radejis Latgolys studeja, sasadorbojūt ar latgalīšu kulturys kusteibu “Volūda”, sagatavejuse 15 jaunus latgalīšu puosoku īskaņuojumus, kū var nūsaklauseit kai lītuotnē “Latvijas Radio pasakas”, tai radejis sātyslopys sadaļā “Radioteātris”. Puosokys nu Latvīšu folklorys kruotivis izdavuma “Latgaliešu pasakas” īrunuojuši: aktrise Kristīne Veinšteina, akters Kristaps Rasims i grupys “Rupuči” dalinīki Ernests i Terēze Rasimi.
2024. gods pavasarī Latvejis Radeja publicēja audio puosoku lītuotni, kurā daīmamys vaira par 400 vysaidu puosoku audio verseju. Niu lītuotne papyldynuota ari ar jaunim puosoku īrokstim latgaliski. Puosokys, gūdynojūt pārņ 100. dzimšonys dīnu svietejušū Latvīšu folklorys kruotivi (LFK), izalaseitys nu profesora Pētera Šmita (1869–1938) sakuortuotuo i 1937. godā LFK izdūtuo kruojuma “Latgaliešu pasakas”. Zvieru, breinumu i jūku puosokys latgaliski vad zam zemis pi kieneņa meitu, gastej Laimis muotis sātā, viestej, kod var pīdzeivuot baranku lieta, kai naīkrist lopsys viļteibuos, kai ceļt pošapziņu začam, taipat stuosta par boguotuo i naboguo bruoļa attīceibom, puosoku varūņu gudreibom, prīcom, bādom, skaudeibu, nalaimi i vysaidom cytom nūtikšonom i pīdzeivuojumim.
Puosoku īrokstu muokslinīcyskais vadeituojs i īrokstu režisors ir Kristaps Rasims, puosokys radejis versejā skaita: aktrise Kristīne Veinšteina, akters Kristaps Rasims, kai ari grupys “Rupuči” dalinīki Terēze i Ernests Rasimi, bet īrokstus papyldynoj postfolklorys grupys “Rikši” muzykys motivi. Puosokys nu kruojuma “Latgaliešu pasakas” izalasejuse Egita Kancāne, īrokstim sagatavejuši Edeite Laime i Kristaps Rasims, bet producējuse Renāte Lazdiņa i Latvejis Radejis Latgolys studeja.
Latvejis Radejis Latgolys studejis vadeituoja Renāte Lazdiņa nūruoda, ka satura radeišona latgaliski ari bārnu auditorejai myusu dīnuos ir cīši svareigs dorbs. “Leidza ar Latvejis Radejis puosoku lītuotnis publiciešonu, ruodejuos logiski, ka tamā vajadzātu byut daīmamam saturam ari latgaliski, deļtuo, turpynojūt sadarbeibu ar “Volūdu” i Kristapu Rasimu, pīduovojam sovu puosoku izlasi latgaliski. Gribīs tik atguodynuot, ka tautys puosokys var byut vysaidys, šaļtim mozuokajim klauseituojim juos ir vierteigi klauseitīs kūpā ar vacuokim, bet cerejam, ka atlaseituos puosokys i latgaliski sagataveitī īroksti ruodeisīs interesanti kai bārnim, tai pīaugušajim,” soka Latgolys studejis vadeituoja.
Nu 2021. gods Latvejis Radejis Latgolys multimedeju studeja kai vīnu nu sovu aizdavumu ir izvierziejuse jaunu literarūs radejis īrokstu latgaliski radeišonu. 2021. godā Rēzeknē īraksteiti Annelis Slišānis projekta “#100dečiLatvijai” stuosti, bet pārņ, gūdynojūt izcylū vaļstsveiru Fraņci Trasunu, topuse Rēzeknis Tautys teatra izvaduma “Francis” radejis verseja. Taipat, sasadorbojūt ar latgalīšu kulturys kusteibu “Volūda” i Kristapu Rasimu (studeja “Reiga”), 2021. godā radeiti Ilzis Spergys stuostu kruojuma “Dzeiveiba” radejis skaitejumi, 2023. godā pyrmatskaņuojumu pīdzeivuojs Alda Bukša kriminalromana “Bruoli” radejis īstudiejums, 2024. gods pavasarī izskaniejuši myusu dīnu prozys autoru – Raibuo, Valentina Lukaševiča, Annelis Slišānis i Egitys Kancānis – dorbi i niu topuši ari jauni latgalīšu puosoku īroksti.
Lītuotni “Latvijas Radio pasakas” var zamynīluodēt ite (Android) voi ite (iOs).
Latgalīšu puosoku īrokstus Latvejis Radejis sātyslopā var klauseitīs ITE.