Daugpilī otkon sasateik LgSC interesenti

29. novembrī nūtyka kuortejuo LgSC Daugpiļs bīdru sanuoksme. Tai kai jau īprīšk nuliemem, ka Latgolys Studentu centram Daugpilī ir juobyun, tāņ atlyka izstruoduot Daugpiļs nūdalis reiceibys planu, apsazynuot lobuokūs ceļus bīdreibys mierku sasnīgšonai, izzynuot, kas mes poši asom par cylvākim i kaidi pīnuokumi i vīta grupā myusim byutum vyslobuokuo.

Piec pyrmajom īsapazeišonuos i lada salauzšonys aktivitatem, vokoru turpinuojom ar Evys prezentaceju par Latgalīšu rokstu volūdu i izcyluokajim Latgolys cylvākim. Lels kraukškeigs paļdis capums jai par stuostejumu!

Piečuok Dagneja īsaceja, kai izastuot auditorejis prīškā i skaisti prezenteit sevi i prezentejamū materialu. Kai vyslobuok puorvareit satraukumu i kontroleit sovus naapzynuotūs žestus, kusteibys, kai pareizi sagataveit vizualū prezentaceju datorā. Paļdis lels ari Dagnejai par tū!

Vysvaira var izdareit struodojūt komandā, deļ tam ir juoatrūn sova eistuo i vyslobuokuo vīta tymā. Sanuoksmi turpynuojom ar pošizzinis testim, kurymūs mes izzynuojom voi otkon puorzalīcinuojom par sovom spiejom, vareišonom, talantim i atbilstūšuokajim pīnuokumim komandys dorbā.

Dagneja stuosteja par komandys nūzeimi mierku sasnīgšonai. Tyka apsavārti naraksteitītī lykumi, kas byutu juozyna i juodora, kab dorbs ītu mudri iz prīšku. Pīmāram, sokam lyudzu i paļdis; skaitom e-postus i atsokam iz tim; ka rūnās problemys, rysynojam iz raizi itml.

Izzynuojuši, kas eisti asam par fruktim mes apsprīdem tū, kai varom snīgt sovu īguļdejumu bīdreibys i Latgalīšu kuļturys lobā caur īspejamim projektim i dažaidom cytom aktivitatem.

Vysi laipni gaideiti cīmā nuokušajos sanuoksmēs i poši ari ar napacīteibu gaidam!!!

 LgSC interesents Artūrs