Daīmami Latgolai veļteituo LNB lekceju cykla īroksti
Itymā rudinī Latvejis Nacionaluo biblioteka (LNB) i latgalīšu kulturys kusteiba “Volūda” aicynuoja iz lekceju cyklu “Latvīšu gruomotai 500. Fokusā Latgola”, kuruo mierkis beja dagrīzt leluokys viereibys ari ūtrymā latvīšu volūdys rokstu tradicejā – latgalīšu volūdā – publicātajim dorbim i volūdys atteisteibai kai taidai, veicynojūt sabīdreibys izpratni, izgleituošonu i zynuošonu daīmameibu par Latgolu i latgalīšu volūdu.
Lekceju cyklā aizvadeitys treis sasatikšonys: 10. septembrī ar kartografi, nūvodpietneicu Andru Melni-Zubko lekcejā ap Latgolys vītvuordim, jūs viesturi i atveidi latgalīšu volūdā, 24. septembrī LNB Letonikys i Baļtejis centra vadeituoja, viesturneica Kristīne Zaļuma stuosteja par muižu biblioteku kolekcejom kai olūtu Latgolys viesturis pietnīceibā, bet 22. oktobrī volūdneica Lideja Leikuma īpazeistynuoja ar pyrmū laiceiguos literaturys dorbu latgaliski “Eisa muoceiba ap audziešonu bišu” (1832).
Niu interesentim, kurī nabeja kluotyn voi grib vēļreiz pasaklauseit dzierdātū, ir vareiba tū izdareit audio formatā LNB “Klauseitovā” (lekceju īroksti tiks papyldynuoti). Īrokstu nūdrūsynuoja LNB.
Nūtikšonu cyklys “Latvīšu gruomotai 500” ir pīcu godu (2021–2025) programa, kurā teik izcalti svareiguokī procesi, kas īkustynuojuši latvīšu raksteituo i īspīstuo vuorda izaplateišonu. 2025. godā tiks atzeimuota pyrmuos īspīstuos latvīšu gruomotys – ļutaru miša – pīci symti godu.
Fotogalerejā: Lidejis Leikumys lekceja, foto Edeite Laime
Lekceju nūtikšonu atbolsta Sabīdreibys integracejis fonds nu Latvejis vaļsts budžeta daškiertūs Kulturys ministrejis leidzekļu projektā “Latgaliskuos kulturvidis styprynuošona: sadarbeiba, izpratne i īsaiste”.
