“Ceidari” suoc jaunū sezonu i aicynoj pīsavīnuot dzīduotuojim

Leidza ar septembri īsasuoc latgalīšu kulturys kusteibys “Volūda” folklorys kūpys “Ceidari” jaunuo dorba sezona. Tuos īsuokumā folklorys kūpa aicynoj pīsavīnuot jaunus dzīduotuojus, bet sezonys laikā svieteis Bierzpiļs dzīsmem veļteituo albuma izīšonu.

Pyrmais pasuokums itamā sezonā folklorys kūpai gaidoms jau jaunnedeļ – pīsadaleišona meilys aiļu i dzīšmu festivalā “Upītes uobeļduorzs” Bolvu nūvoda Upītē. Ite byus ūtrei reize, kod “Ceidari” pīsadaleis festivalā. Īprīškejā reizē, kod kūpa 2014. godā beja gostūs festivalā, tyka pastateits eists Upītes uobeļneicu duorzs, kurā “Ceidaru” uobeļneica niu izauguse vīna nu pošu leluokūs i kupluokūs.

Ari jaunajā sezonā folklorys kūpys mieginuojumu laiks byus taipat trešdīnem 18.00 stuņdēs Reigys centrā. “Ceidarim” pīsavīnuot var ari jauni dzīduotuoji/muzykanti, i interesenti atīt apsavērt, īpasazeit i padzīduot aicynuoti mieginuojumā 20. septembrī 18.00. Vaira dazynuošonai drūsai var raksteit lgsc@lgsc.lv voi “Ceidarim” Facebook lopā ITE voi zvaneit 29509672 (Edeite).

Vosorā folklorys kūpa pīsadaleja Dzīšmu i deju svātkūs, kai ari eistynuoja seņ dūmuotu sapynu – īraksteja Bierzpiļs pusei i tuos dzīduotuojim veļteitu dzīšmu albumu “Skaisti putneni dzīduoja”. Albums niu ir apstruodis procesā pi skaņu apstruodis meistara Kaspara Bārbala īrokstu studejā “Lauska”, bet folklorys kūpa pa mozeišam plānoj albuma prezentacejis i sovys dzīduošonys 10. jubilejis koncertus 2. novembrī Reigā i 4. novembrī Bierzpilī. Albuma tapšonu atbolsta Vaļsts kulturkapitala fonda mierkprograma “Latvīšu viesturiskūs zemu atteisteibys programa”.

Atguodynuosim, ka “Ceidari” ir latgalīšu kulturys kusteibys “Volūda” folklorys kūpa, kurei dorbojās jau vaira nakai 10 godu. Tamā sasatykuši vysaidu vītu latgalīši, kurī niu dzeivoj Reigā i tuos apleicīnē. Dzīšmu i dorba volūda – latgalīšu. Folklorys kūpys repertuarā vysu vaira ir tūs vītu – Bierzpiļs, Škilbāni, Auleja, Rūžupe i cytys – dzīsmis, nu kurūs īt kūpys dalinīki.