“Ceidari” pabeiguši albuma īroksta dorbus
Nu 17. da 19. juļa latgalīšu kulturys kusteibys “Volūda” folklorys kūpa “Ceidari” struoduoja pi Bierzpiļs dzīsmem i dzīduotuojim veļteituo albuma īroksta studejā “Lauska”, Reigā.
Trejuos īrokstu dīnuos pabeigts dorbs pi vysu desmit albumā paradzātūs dzīšmu, kurys sovulaik dzīduojuši Bierzpiļs pusis dzīduotuoji Ciprians Pokrotnīks, Anna Bundža, Anna Stiernīks, Marta Šmidte i Bronislava Romanovska. Dzīšmu īrokstūs pīsadalejuši 11 “Ceidaru” dalinīki, instrumentus – bubynu, vejūli, kūkli i akordeonu – īspieliejuši “Ceidaru” muzykanti, kai ari gostūs paaicynuota kūklātuoja Inta Rēvolde.
Īrokstu procesu divejis dīnys īmyužynuojs video operators Elmārs Pēterāns i piečuok kotram byus vareiba nūsavērt, kai folklorys kūpai guoja itymūs dorbūs.
Koč ari suokūtnejais plāns beja, ka “Ceidaru” Bierzpiļs dzīsmem veļteitais albums sauksīs “Skaisti putneni dzīduoja”, kas ir vīna nu albuma dzīšmu, kū dzīduojuse Bronislava Romanovska, vys tik izlamts par tituldzīsmi i reizē albuma nūsaukumu jimt Cipriana Pokrotnīka dzīduotū “Dzīduotumi, ļustātumi”, kas vaira raksturoj folklorys kūpys desmit darbeibys godus – dzīduot, lai pošim prīca.
Niu īraksteitū materialu apstruoduos skaņu režisors Kaspars Bārbals. Prīškā vēļ īrokstu puorsaklauseišona, preciziešona, vajadzeibys gadīnī lobuošona, kai ari plānuots albumu sataiseit “Dolby Atmos” skaņu sistemā, kas atbiļstūšā aparaturā ļaus albumu klauseitīs telpiskuos skanis variantā.
Folklorys kūpa “Ceidari” ir pateiceigi studejai “Lauska” i Kasparam par īdrūšynūšū, profesionalū i pacīteigū dorbu, lai kūpys pyrmais albums palyktu par eistineibu.
Bierzpiļs dzīsmem veļteituo albuma “Dzīduotumi, ļustātumi” īrokstu finansiali pabaļstejuse Vaļsts kulturkapitala fonda mierkprograma „Latvīšu viesturiskūs zemu atteisteibys programa“ i privatī zīduotuoji.
