Baļtinovys, Naujinis i Pušmucovys stuosti portala lakuga.lv rokstu serejā “Muna vīta”
Latgalīšu kulturys ziņu portals lakuga.lv, kuruo saiminīks ir bīdreiba “LgSC” nūslēdzs rokstu i video materialu sereju “Muna vīta”, kurā ostoņūs rokstūs i treis video materialūs izstuostejs par Bolvu nūvoda Baļtinovu, Augšdaugovys nūvoda Naujini i Ludzys nūvoda Pušmucovu i tūs īdzeivuotuoju sajiutom ituo gods administrativi teritorialuos reformys procesūs, kai ari īsavērs kotrys vītys pīdareibys ceļūs laika gaitā.
Ituo gods oktobrī portals lakuga.lv aizsuoce publicēt rokstu i video materialu sereju “Muna vīta”, pi kuruos portala komanda suoce struoduot jau augstā. Serejis mierkis beja skaidruot jaunuos administrativi teritorialuos reformys izmainis, kai tuos ītekmej Latgolys regiona mozuos vītys, jemūt vārā kulturvidis, kulturpolitikys i pīdareibys vaicuojumus, serejis nūsaukumā simboliski savejūt, kai kotrys vītys īdzeivuotuoju sajiutys par sovu apdzeivuotū vītu, tai ari nūsaceitū vaicuojumu, kur tod ir tei pīdareibys vīta car laikim.
Rokstu serejā portala skaiteituoji varēja īpasazeit ar treis Latgolys vītom: Baļtinovu – īprīškejā administrativajā teritorialajā īdalejumā mozuokū nūvodu Latvejā, bet niu cyta – Bolvu nūvoda – nu centra attuolu punktu, Naujini – vītu, kurai pīdareiba cīši nasamaineja, bet juopīrūn pi piļneigi jauna, da ituo nabejuša nūvoda nūsaukuma i reizē juosaprūt, kaids byus aizsuoktais process vēļ cytom izmaiņom iz prīšku – planavuotajai Augšdaugovys nūvoda apsavīnuošonai ar Daugovpiļs piļsātu, kai ari Pušmucovu, kuruos dzeivis ritmu nūvoda pīdareibys pamaineišona nu Cyblys iz Ludzys cīši naītekmej.
Portala redaktore Sandra Ūdre, atsaverūt iz rokstu serejis tapšonu i Latgolys vītu sajiutom, soka: “Kotrā nu vītu, kurā saguoja pagasteit rokstu serejā, ir atskireigi stuosti i cikom vēļ tamuos volda lela naizpratne, kaida byus dzeive iz prīšku, jo reforma viņ tikū nūtykuse. Nu, nasaverūt iz vysim sarežgejumim, naskaidreibom, pīaugūšūs dorbu apmāru i attuolumi da jaunūs nūvodu centrim, cīši prīcynoj satyktūs vītejūs dzeivuotuoju apjiemeiba vysus aizsuoktūs dorbus dareit iz prīšku, atteisteit sovu vītu i raudzeit pīsalāguot jaunajim apstuoklim. Prīcojamīs ari, ka portalam ir bejuse vareiba dokumentēt ituos administrativi teritorialuos reformys nūtikšonu i turim nūceju, ka itamuos pošuos vītuos varēsim atsagrīzt vēļ piec šaļts i nūskaidruot ītekmi ari garuokā laika periodā.”
Portala lakuga.lv skaiteituojim beja vareiba puorskaiteit i nūsavērt itaidus rokstu serejis “Muna vīta” materialus:
Baļtinova (Bolvu nūvods)
- Baļtinova administrativūs rūbežu puormejuos https://www.lakuga.lv/2021/10/28/muna-vita-baltinova-administrativus-rubezu-puormejuos/
- Baļtinovai jaunuo reforma nav atsagrīzšona vacajā rajonā https://www.lakuga.lv/2021/10/28/muna-vita-baltinovai-jaunuo-reforma-nav-atsagrizsona-vacaja-rajona/
Naujine (Augšdaugovys nūvods)
- Voi nūvoda nūsaukuma puormeišona mainejuse ari dzeivi Naujinē? https://www.lakuga.lv/2021/11/30/muna-vita-voi-nuvoda-nusaukuma-puormeisona-mainejuse-ari-dzeivi-naujine/
- Naujinis pogosta teritoreja viesturis laika grīžkūs https://www.lakuga.lv/2021/11/30/muna-vita-naujinis-pogosta-teritoreja-viesturis-laika-grizkus/
- Pasavērt iz Naujini nu muokuļu augstuma. Saruna ar Olgu Kuzminu https://www.lakuga.lv/2021/11/30/pasavert-iz-naujini-nu-muokulu-augstuma-saruna-ar-olgu-kuzminu/
Pušmucova (Ludzys nūvods)
- Pušmucuoni mozajā Cyblys nūvodā jutuos lobuok i drūsuok https://www.lakuga.lv/2021/12/10/muna-vita-pusmucavisi-mozaja-cyblys-nuvoda-jutuos-lobuok-i-drusuok/
- Pušmucova eipašnīku, varu i reformu puormejuos https://www.lakuga.lv/2021/12/10/muna-vita-pusmucova-eipasniku-varu-i-reformu-puormejuos/
- Kur cytur, ka na dzymtajā Pušmucovā? Saruna ar Intu Domarku https://www.lakuga.lv/2021/12/10/muna-vita-kur-cytur-ka-na-dzymtaja-pusmucova-saruna-ar-intu-domarku/
Rokstu i video materialu sereju “Muna vīta” portala lakuga.lv komanda eistynuoja Medeju atbolsta fonda finansātajā projektā “VĪTA”, projekta eistynuotuojs bīdreiba “LgSC”. Portala redaktoris Sandrys Ūdris sagataveitī stuosti par Baļtinovu i Naujini ir puorskaitomi ari žurnalā “A12”. Video materialu sagataveišonā sūpluok portala žurnalistem Sintijai Augustovai i Edeitei Husarei pīsadaleja Evita Broka i Ilva Anspoka, video grafikys taisejs Krišjānis Pleiko nu “Upes kinostudija”.
