Atbaļsteits projekts portala lakuga.lv darbeibys atteisteišonai
Nūsaslēdzs Medeju atbolsta fonda (MAF) programys projektu konkurss regionalūs i vītejūs medeju atbolsta projektu eistynuošonai, viestej Sabīdreibys integracejis fonda izziņuotuo informaceja. Programā atbaļsteiti 45 projekti, kurūs vydā ari vīns bīdreibys “LgSC” projekts latgalīšu kulturys ziņu portala lakuga.lv darbeibys atteisteišonai.
Programā “Regionalūs i vītejūs medeju atbolsta programa”, kurys finansiejums ir nu Latvejis Republikys Kulturys ministrejis daškiertūs leidzekļu i kurā projektus beja vareiba īsnēgt divejuos kategorejuos: “Sabīdryski nūzeimeigs saturs” i “Latgolys regions” nu 56 projektu dasacejumu atbolstu sajāmuši 52 projekti aba 93 % nu vysu dasaceitūs projektu, sajamūt nūlykumā nūsaceitū minimali vajadzeigū punktu skaitu i atbiļsteibu viertiešonys kriterejim, daīmamū finansiejumu proporcionali sadolūt storp vysim dasacejumim. Kūpā apstyprynuoti projekti 1 359 590 eiro vierteibā, nu tūs 214 850,59 eiro daškierti taišni kategorejā “Latgolys regions”, nūdrūsynojūt regiona īdzeivuotuojim kvalitativu i sabīdryski nūzeimeigu politikys, ekonomikys voi kulturys nūtikšonu paruodeišonu i padzilinuotu procesu skaidruojumu.
Projektu dasacejumus piec atbiļsteibys i kvalitatis kritereju viertieja konkursa komiseja, kuruos vydā beja četri augstškolu puorstuovi (ari nu regionalūs augstškolu), pa vīnam puorstuovam nu Latvejis Medeju etikys padūmis i Baļtejis Medeju izcileibys centra, pa divejim puorstuovim nu Kulturys ministrejis i Nacionaluos elektroniskūs plašsazinis leidzekļu padūmis. Sabīdreibys integracejis fonda puorstuovs vadeja komisejis dorbu, tok viertiešonā i bolsuošonā napīsadaleja.
Bīdreibys “LgSC” projekts “Latgaliskā kultūrtelpa: problēmas, analīze un atspoguļojums portālā lakuga.lv” sajiems 23 862,48 € lelu atbolstu kategorejā “Sabīdryski nūzeimeigs saturs”. Projektā paradzāts sagataveit saturu latgalīšu rokstu volūdā, kas paleidzēs styprynuot i atteisteit izpratni i zynuošonys par latgaliskū kulturtelpu. Projektā tiks sagataveiti 40 roksti, intervejis i skaidruojumi taiduos rubrikuos kai “Lakuga.lv vaicoj”, “Kruojuma duorgumi”, “Pa latgalīšu pādim” i “Īpazeisti latgalīšu volūdu”. Portala sagataveitī roksti desmit reizis byus publicāti ari laikrokstā “Vietējā Latgales Avīze” i četrys reizis žurnalā “A12”. Projekta eistynuošona sūpluok sabīdreibys informiešonai i izgleituošonai par latgaliskuos kulturytelpys vaicuojumim, ļaus stabilizēt, styprynuot i atteisteit ari poša portala darbeibu, paleidzūt sagataveit kvalitativuoku, interaktivuoku portala saturu, kai ari jo eipaši paplašynuot i aktivizēt portala dorbu socialajūs teiklūs.
Projektā īsaisteita vysa portala lakuga.lv redakceja – redaktore Laura Melne, žurnaliste Laura Spundere, žurnaliste i socialūs medeju redaktore Edeite Husare, kai ari multimedeju materialu veiduotuoja i socialūs medeju leidzredaktore Amanda Anusāne.