Ari Rēzeknis jaunīši pīrakstejuši diktatu latgaliski
14. oktobrī latgalīšu kulturys kusteiba “Volūda” gasteja Rēzeknis vaļsts pūļu gimnazejā, kur vadeja latgalīšu volūdys pareizraksteibys stuņdi i pīduovuoja vareibu kūpā pīraksteit ostoitū pasauļa diktatu latgaliski.
Pasauļa diktats latgalīšu rokstu volūdā itūgod beja jau ostoitū reizi. Juo reikuotuoji ir “Volūda” i Latvejis Radejis Latgolys multimedeju studeja. Jau trešū godu, veicynojūt interesi par latgalīšu volūdu, beja gasteišona ari kaidā nu Rēzeknis školu. Diktats ir raksteits Rēzeknis Vaļsts 1. gimnazeja, Austrumlatvejis Tehnologeju vydsškolā, bet itūreiz diktatu paraudzeja raksteit vaira nakai 20 Rēzeknis vaļsts pūļa gimnazejis 11. klasis školānu kūpā ar divejom školuotuojom. Vysa pyrma interesentim beja vareiba izzynuot 10 volūdys pareizraksteibys lykumus, bet piečuok jūs jimt vārā diktata raksteišonā. Kai īprīšk viesteits, 12. oktobrī Latvejis Radejis 1 eterā raidejumā “Kolnasāta”, kai ari socialajūs teiklūs skanēja muzika, pasuokumu vadeituoja i aktera Kristapa Rasima īrunuotais diktats – puosoka “Lopsa sludynoj mīru” ar lopsys i rubyna dialogu. Diktatu jaunīši beja vareiba raksteit kai tīšsaistis formā, tai i iz papeira.
Iz vaicuojumu, cik nu jaunīšu kasdīnā runoj latgaliski, apstyprynojūši atsaceja aptyvai puse nu klasis, bet tik vīns voi diveji nu jaunīšu kasdīnā ari roksta latgaliski, deļtuo rokstu volūdys nūdarbeiba ir kai vareiba paraudzeit suokt raksteit i veids, kai jaunīšim saistūšuok runuot par volūdys gramatiku i latgalīšu volūdys izmontuošonu. Rēzeknis vaļsts pūļu gimnazejis škoļneica Lauma Pučeite, kura vosorā beja ari latgaliskuo jaunīšu seminara “Atzolys” dalineica, soka, ka itei bejuse breineiga vareiba, kam da ituo nabeja saguojs cik daudzi raksteit latgaliski. “Koč i diktata raksteišona nabeja vīgla, vys tik es tyku da gola i dabuoju lelu gandarejumu. Diktats kai taids beja cīši naīrosts, bet maņ jis cīši patyka, kam deve vareibu puorbaudeit sovys prasmis i izzynuot, kur es vēļ varu pylnveiduotīs.”
Nūdarbeibys vadeituoja, “Volūdys” puorstuove Amanda Anusāne skaita, ka diktats ir lobs veids, kai i jaunīšim paruodeit, ka taida volūda i raksteiba ir. “Klaidu īrosts ir cīši daudz, bet mes tū nikod naizsveram – tys nav švaki, taišni ūtraiži – klaidys paruoda realū situaceju, ka ir problemys ar raksteišonu, kam latgalīšu volūda školuos nateik vuiceita jau gondreiž 100 godu.”
Latgalīšu kulturys kusteiba “Volūda” soka paļdis Rēzeknis vaļsts pūļu gimnazejis karjerys konsultantei Kristīnei Rimšai, latvīšu volūdys školuotuojai Silvejai Volānei i 11. klasis školānim par atsauceibu!
Ka i cytuos školuos i klasēs grib raksteit diktatu latgaliski, ituo gods diktats video formatā daīmams ITE, bet, ka ir gribiešona kaidā vydsškolā Latgolā saorganizēt volūdys nūdarbeibu ar voi bez diktata raksteišonys, drūsai var sasazynuot ar “Volūdu” rokstūt vasals@voluda.lv.
Fotogalerejā: latgalīšu diktata raksteišona Rēzeknis vaļsts pūļu gimnazejā
Diktata raksteišonu školā finansiali atbolsta Sabīdreibys Integracejis fonds nu Kulturys ministrejis daškiertūs Latvejis vaļsts budžeta leidzekļu latgalīšu kulturys kusteibys “Volūda” projektā “Latgaliskuos kulturvidis styprynuošona: sadarbeiba, izpratne i īsaiste”.
