Ar pastaigu, diktata raksteišonu i koncertu nūsaslēgs latgalīšu volūdai draudzeigūs vītu spēlis sezona
Ituo gods junī latgalīšu kulturys kusteiba “Volūda” i portals lakuga.lv Rēzeknē atkluoja spēli-maršrutu, kurā rēzeknīši piļsātys gosti varēja izzynuot 13 (i na viņ) latgaliskuos vītys i latgalīšu volūdu piļsātvidē Rēzeknē. Aktivajai spēlis sezonai īmūt iz golu, interesenti sastdiņ, 14. oktobrī, teik aicynuoti iz vairuokom latgaliskom nūtikšonom – kūpeigu spēlis maršruta izīšonu, latgalīšu rokstu volūdys diktatu i koncertu “Četrpadsmit stuosti”.
Spēlē “Latgalīšu volūdai draudzeiga vīta – ite Rēzekne!” vēļ arviņ var pīsadaleit kotrys grybātuojs, izīmūt maršrutu i gastejūt 13 latgalīšu volūdai draudzeiguos vītuos Rēzeknē, izzynojūt vītys, atbiļdūt iz vaicuojumim i padorūt vysaidus aizdavumus. Spēlis maršruts suocās pi Latgolys kulturviesturis muzeja i turpynuojumā vad iz “Rancāna pogolmu” ar “KUUP Coffee” i “Ausmeņa kebabs”, gruomatneicu “Liesma”, zūbuorstnīceibu “ZŪBS”, Rēzeknis Tehnologeju akademeju, Latvejis Radejis Latgolys studeju, Latgolys viestnīceibu “Gors” i cytom vaira voi mozuok zynomom latgaliskom vītom piļsātā. Pīsadolūt spēlē da 14. oktobra, dalinīkim ir vareiba pretendēt iz spēlis pyrmuos sezonys bolvom, bet spēle i tuos informativuos nūruodis ari iz prīšku byus daīmamys piļsātvidē kai izzynojūšs i izgleitojūšs pasuokums i materials.
Sastdiņ, 14. oktobrī, spēlis veiduotuoji aicynoj iz vairuokom latgaliskom nūtikšonom, simboliski īzeimojūt spēlis aktivuos sezonys nūslāgumu. 15 stuņdēs, sasateikūt pi Latgolys Kulturviesturis muzeja, ir vareiba izīt spēli kūpā ar kusteibys “Volūda” puorstuovim, dorūt aizdavumus i izzynojūt latgaliskū piļsātā. Piečuok 18 stuņdēs Latgolys viestnīceibā “Gors” varēs pīsadaleit latgalīšu rokstu volūdys diktata raksteišonā kluotīnē. Diktatu itūgod īrunuojuse aktrise Katrīna Griga, bet tekstu tam speciali sarakstejuse pyrmuo latgalīšu komiksa bārnim “Sunāns breiveibā” autore Laura Melne. Bet 19 stuņdēs “IGGI bārs&karbonādes” byus spēlis dalinīku apbolvuošona i koncerts “Četrpadsmit stuosti”, kurā uzastuos džeza muziki Kristians Justs, Mārcis Lipskis, Kalvis Sležis-Zaļkalns i soliste Laura Svikša. Vysys nūtikšonys ir bez īīšonys moksys i tamuos var pīsadaleit kotrys grybātuojs (naatkareigi nu tuo, voi jau ir voi vēļ nav pīsadalejs spēlē).
Nu spēlis īsasuokšonys junī jau bejušys vairuokys tai veļteitys nūtikšonys – julī puorguojīņs kūpā ar naformalū apvīneibu “Nezināmā Rēzeknē”, izzynojūt Rēzeknei i Latgolai nūzeimeigūs vītu stuostus, bet augustā iz stadiona sīnys pi Rēzeknis Sporta puorvaļdis kūpā ar grafiti muokslinīku i “Ausmeņa Records” dalinīku Valteru Murānu grafiti darbneicā lelim i mozim izzeimuota seikšaļtenis atzeime #latgaliski i cyti uzroksti latgalīšu volūdā.
Latgaliskūs vītus spēle ir taiseita tai, lai tū bezmoksys varātu izīt sevkurā laikā naatkareigi nu maršrutā īkļautūs vītu dorbalaika, taipat spālātuojim ir sagataveiti vairuoki puorsteigumi – eipašūs akceju voi spēlis suveniru veidā. Vyss, kas spālātuojim vajadzeigs – mobilais telepons ar škārsteiklu i kameru, gataveiba īt 5 km garu ceļu i tam veļteit 1,5–2 stuņdis laika. Ka spālātuoji grib pagasteit ari maršrutā īkļautajuos vītuos vydā, tod vālams spēlis laiku pīmāruot vītu dorbalaikam. Itys maršruts ir ari vīns nu veidu, kai piļsātys gostim īpazeit Rēzekni. Taipat spālātuojim maršrutā ir sagataveiti vairuoki puorsteigumi – kai spēlis vītu eipašī pīduovuojumi, tai ari maršruta nūīšonys suvenirs golapunktā. Itei spēle ir vīns nu veidu, kai piļsātys gosti izzynuot Rēzekni – jo eipaši tuos latgaliskū daļu.
Spēle “Latgalīšu volūdai draudzeiga vīta – ite Rēzekne!” ir vīna nu akcejis “Latgalīšu volūdai draudzeiga vīta” aktivitašu. Akcejis, kuru reikoj latgalīšu kulturys kusteiba “Volūda” i portals lakuga.lv, mierkis ir mudynuot kasdīnys saziņā vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu atsatīkšonu pret tū. Akcejis daleibnīkus var atpazeit piec eipašu akcejis uzleimu. Vaira informacejis par spēli ite: https://www.lakuga.lv/ltgdraudzeigs-rezekne/, bet par akceju ite: https://www.lakuga.lv/ltg-vita/.
Spēli “Latgalīšu volūdai draudzeiga vīta – ite Rēzekne!” informativi atbolsta Latgolys Turisma asociaceja, bet spēle i tuos aktivitatis teik reikuotys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozū kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Informaceja par spēli i tuos nūsacejumi (LVS i LTG) ite: https://www.lakuga.lv/ltgdraudzeigs-rezekne/