Aizvadeita LgSC kūpsapuļce

21. janvarī Rēzeknē nūtyka bīdreibys „Latgolys Studentu centrs”  (LgSC) bīdru kūpsapuļce. Sēdis laikā tyka apsprīsti dažaidi svareigi vaicojumi par bīdreibys dorbu, izvirzeitys nuokušuo gods prioritatis, īvālāta jauna LgSC vaļde i c.

.
Kūpsapuļce suocēs ar īsapazeišonu (ir pījamti 12 jauni bīdri) i regionalūs biroju atskaitem par padareitū.

.
Reigys birojā napylna goda laikā nūtykušs daudzi pasuokumu: latgalīšu vokori folkklubā „Ala pagrabs”, literaturys i muzykys piecpušdīne „Agrais Pavasars”, Muzeju nakts, stuostu vokori „Latgalīša pādi pasaulī”, „Tievanānu čulans”, Kaupra valnakmiņa tolka kūpā ar apvīneibu „Mazā Kavalērija”, kinys „Latgolys Laikadečs” ruodeišona Reigā i c.  Reigys biroja studenti sarakstiejuši i sajāmuši atbolstu nu Kulturys ministrejis projekta „Latgaliešu kultūras ziņu portāls Lakuga.lv” realizeišonai. Projekta golvonī aizdavumi ir: portala darbeibys nūdrūšynuošona, jaunu sadaļu i vizualuo nūformiejuma sataiseišona, jaunu rokstu autoru pīsaisteišona i cytys svareigys ar Lakuga.lv darbeibu saisteitys lītys. Pošu šaļti Reigys birojs meklej jaunu biroja koordinatoru.

.
Rēzeknis birojā napylna gods laikā ir pasamainejuši vairuoki biroja vadeituoji, bet tys naasūt trauciejs pilnvierteigam LgSC dorbam. LgSC aktivisti i bīdri ir aktivi jāmūši daleibu Rēzeknis Augstškolys reikuotojūs pasuokumūs: informacejis dīnā, Muokslys dīnuos, Zynuotnīku naktī i c. Kai ari reikovuši sovus pasuokumus: literari muzykalys piecpušdīnys, naformalis LgSC aktivistu sasatikšonys. Rēzeknis birojā napylna gods laikā pījimti 4 jauni bīdri. LgSC sasadorbojūt ar Nūdarbynuoteibys valsts agenturu (NVA) Rēzeknis biroja 5 aktīvistim moksoj stipendeju 40 Ls apmārā par breivpruoteigū dorbu, kū jī dora bīdreibā. LgSC Rēzeknis nūdalis vadeituoja Diāna Miščenko stuosta, ka sasadorbojūt ar Rēzeknis Augstškolu LgSC Rēzeknis birojs naseņ asūt puorsaciels iz jaunom telpom, jaunais biroja adress pavysam dreiž pasaruodeis LgSC sātys lopā sadalī: kontakti/Rēzeknis birojs.

.
Daugovpiļs birojs ar vaicojumu „Voi Daugovpilī ir vajadzeigs LgSC?” novembrī atsuocs  sovu darbeibu nu jauna. Tai kai jaunī 12 aktivisti – Daugovpiļs Universitatis (DU) studenti, sasatyka pyrmū reizi, vaira maneibys pagaidom asūt pīviersuš sevis i cytu bīdru īpazeišonai i komandys taiseišonai (salīdeišonai) – na pasuokumim. Decembrī LgSC sasadorbojūt ar Raiņa sātu Berkenelē reikuoja literari muzykalū pasuokumu „Latgalīts – Latgalīšam – Draugs” (LaLaDra). Struodojūt Daugovpiļs birojā, studenti paspēja izpieteit LgSC kai sabīdrysku organizaceju, apzynuoja LgSC organizacejis kulturu, stypruos, vuojuos pusis i cytus bīdreibys darbeibu ītekmejūšus faktorus. Daugovpilīši sarakstē projektu „Vuicēsimēs raksteit latgaliski” i sajiema finansialu atbostu nu Kulturys Ministrejis. Projekta mierkis ir, sasadorbojūt ar volūdnīkim i pedagogim, izstruoduot jaunu, jaunīšim lobuok saprūtamu latgalīšu rokstu volūdys vuiceišonys modeli i vuiceit studentim i školu školānim raksteit latgaliski. LgSC Daugovpiļs biroja vadeituoja Zaiga Lāce stuosta, ka ari iz prīšku daugpilīši planavoj aktivi īsasaisteit Latgolys kulturys dzeivē, vīns nu pyrmajim aizdavumim byušūt jaunu aktivistu pīsaiste i LgSC prezentaceja cytim DU studentim.

.
Piec biroju atskaitem tyka izstuosteits par cytu projektu īspiejom, par fondim i agenturom, kas pīduovoj atbolstu. LgSC gruomatveds Artis Logins īpazeistynuoja ar finanšu goda puorskotu i sajamtū revidenta Harija Bernāna atzinumu.

.
Bīdreibai tyka īvieleita jauna vaļde: Raitis Tučs, Vineta Vilcāne, Jānis Papiņš, Ilze Bojāre, Dagnija Bramane, kas puorstuov vysus LgSC regionalūs birojus.

.
Lai veicynuotu bīdru komunikaceju i sadarbeibu, LgSC zynuošuokūs bīdru (ekspertu) zynuošonu i pīredzis apmaini ar jaunuokajim bīdrim, kūpsapuļcis nūslāgumā tyka organizātys „World Café” (latgaliski: Pasauļa kopejneicys ) diskusejis. Sarunu laikā varieja īsapazeit ar IT tehnologeju izmantuošonu dorbam (e-posti, socialī teikli) – eksperts Raitis Tučs; finansis, finanšu atskaitis projektim – Artis Logins; projekta ideja, projekta raksteišona – Ilze Sperga; Latgalīšu volūda, Lakuga.lv – Edeite  Husare; nanūpītnuokys sarunys atpyutai – ideālais latgalīts i idealuo latgalīte Zaiga Lāce, Eva Kasparenoka .
Kai šytuo gods LgSC prioritates tyka izvirzeitys: sadarbeibys kulturys veicinuošona, komunikacejis apmaiņa, informacejis par LgSC darbeibu i pasuokumim snīgšona iz uoru. Vaira par bīdreibys dorbu tiks dūmuots, runuots i dareits jaunuos vaļdis sēdē 31. janvarī Reigā.

.
Lai bīdreibai „Latgolys Studentu centrs” saīt piļdeit sovu miseju: saglobuot, popularizēt i atteisteit latgaliskuos kulturys vierteibys, nūdrūšynuot jūs dzeivuotspieju, pīlāguot ituos vierteibys itam laikam, izceļt latgaliskū latvyskajā, paruodeit jū kai vīnuotu, naatjemamu latvyskuo sastuovdaļu i veicynuot jaunīšu vydā izpratni par latgaliskajom vierteibom kai īpašom, atškireigom, unikalom i lapnuma vārstom, reizē nūsarūbežojūt nu politisku vaicuojumu rysynuošonys, arī šymā godā!

.
LgSC Daugovpiļs biroja studenti
.