Aizvadeita latgalīšu volūdys i medejprateibys nūdarbeiba Saļnovā
21. septembrī latgalīšu kulturys kusteibys “Volūda” uzturātuo latgalīšu kulturys ziņu portala lakuga.lv redakcejis puorstuovis Laura Melne i Amanda Anusāne gasteja Saļnovā, jaunīšim nu Kuorsovys nūvoda jaunīšu centra “Pūga” i cytim interesentim, pīduovojūt nūdarbeibu ap latgalīšu rokstu volūdu i tuos izmontuošonu medejprateibys temā, vaira seve pasorgojūt ditigalajā vidē.
Nūdarbeibā, kas beja vīna nu pyrmūs sasatikšonu piec tuo, kai Kuorsovys nūvoda jaunīšu centrs “Pūga” atsuocs sovu darbeibu, pīsadaleja aptyvai 15 jaunīšu nu Kuorsovys nūvoda. Nūdarbeibys pyrmajā daļā beja vareiba vaira izzynuot par latgalīšu volūdys raksteibys pamatim, pyldūt aizdavumus, bet ūtrajā daļā izzynuot par tū, kai, izmontojūt mozuoklītuotuos volūdys, seve vaira pasorguot škārsteikla vidē, kam dagrīzt viereibys, radzūt viests – medejūs voi e-postu sarakstē – latgaliski.
Jaunīte Agnese Skangale jau bejuse trejuos latgalīšu volūdys apvuiceibuos, tok itei beja pyrmuo, kurā tyka stuosteits vaira par tū, kai ituos prasmis var nūderēt digitalajā vidē. Jaunīte Signija Igaune piec nūdarbeibys prīceigi soka: “Beja cīši interesanta i izzynūša nūdarbeiba, izzynuoju, kū doru napareizi kasdīnā, jo rokstu kai runoju, tok raksteiba vys tik atsaškir nu izrunys.” Tok Signija Voite pībiļst: “Maņ ari cīši patyka, es skaitu, ka sevkuram latgalīšam, kurs kasdīnā lītoj latgalīšu volūdu, ir cīši nūdareigi pasavuiceit rokstu volūdu.”
Sasatikšona ar jaunīšim nu Kuorsovys nūvoda jaunīšu centra “Pūga” beja pādejuo nūdarbeiba, kū latgalīšu kulturys kusteiba “Volūda” pīduovuoja digitaluo aktivisma akseleratora programys projektā, kurū atbolsta TechSoup Global teiklys, Hive Mind globaluo vuiceišonuos platforma, Baļtejis Medeju izcileibys centrys i Google.
Fotogalerejā: latgalīšu volūdys i medejprateibys nūdarbeiba Saļnovys kulturys nomā, foto Amanda Anusāne
