Aizvadeita diskuseja par beišonūs nu latgaliskuo
Pīktdiņ, 5. julī, Rancāna pogolmā Rēzeknē nūtyka diskuseja, kas veļteita latgalīšu volūdai i bailei nu latgaliskuo vysaidūs aspektūs. Taipat vokora laikā kotram interesentam beja vareiba vaira izzynuot ari par iniciativu “Bolsu tolka” i paraudzeit pošam īrunuot kaidu nu latgaliskūs teikumu.
Diskuseja nūtyka Rancāna pogolmā, kas ir pārnejā vosorā Rēzeknē attaiseita kulturvīta, kurā, pīduovojūt piļsātys dzeivuotuojim i gostim regularus koncertus, diskusejis i cytys nūtikšonys, apsavīnuojuši kopeja konceptveikals “KUUP” i “Ausmeņa Kebabs”. Sasadorbojūt Rancāna pogolmam i latgalīšu kulturys kusteibu “Volūda”, Rēzeknē nūtyka diskuseja, kas veļteita latgalīšu volūdai i bailei nu latgaliskuo. Diskusejā pīsadaleja “KUUP kopeja grauzdātovys” saiminīks Oskars Maculevičs, literate Ilze Sperga, muzike i vacuoku seminaru vadeituoja Guna Kise i geštaltterapeite Gunita Veismane, bet diskuseju vadeja kulturys montuojuma eksperte i pasuokumu moderatore Iveta Balčūne.
Ideja par itaidu temu roduos piec sarunys ar KUUP saiminīku Oskaru, kurs izsaceja dūmu, ka šaļtim vaira grybātu dareit nazkū latgaliski, tok ir baist, ka nazkas byus napareizi. Ari situacejuos, kod vacuoki izalosa narunuot ar bārnim latgaliski, ir kluotyn nazkaids bailis faktors, ka latgaliskais nabyus bārnim tys lobuokais, deļtuo ari ruodejuos īdareigi itaidu tematu aktualizēt i raudzeit pošim pameklēt tuos bailis īmesli. Kai sacynuots piec diskusejis, īmesli bailem kotrā nu sferu – dorbs, saime, publiskuo vide – ir reizē cytaiži i leidzeigi, taipat atsaškir cylvāku pīredzis, bet kūpumā vajadzātu leluoku sabīdreibys īdrūsynuojumu. Taipat vysi diskusejis dalinīki atzyna, ka itei ir cīši svareiga i aktuala tema, par kurū runuot, lai styprynuotu puorlīceibu izmontuot latgalīšu volūdu vaira i nasabeit.
Diskusejis laikā i šaļti piec juos beja vareiba vaira izzynuot ari par volūdys tehnologeju iniciativu “Bolsu tolka”, kai ari pošam paraudzeit īrunuot pyrmūs teikumus latgaliski. Par iniciativu vaira pastuosteja i īrunuošonā tehniski paleidzēja Rēzeknis Tehnologeju akademejis vodūšuo pietneica Antra Kļavinska. Īrunuotī teikumi iz prīšku paleidzēs latgalīšu volūdys izmontuošonai myusu dīnu tehnologeju reikūs.
Diskusejis nūtikšonu finansiali pabaļsteja Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Fotogalerejā: diskuseja “Baile nu latgaliskuo” Rēzeknē, foto Dagnija Bernāne
