Aicynojam raksteit ostoitū diktatu latgalīšu volūdā
Oktobra vydā teik svieteita Vaļsts volūdys dīna i, dūmojūt ap tū, 12. oktobrī puorbaudeit sovys zynuošonys i prasmis latgalīšu rokstu volūdā aicynuos ari ostoitais diktats latgalīšu volūdā. Diktats skanēs Latvejis Radejis 1 eterā latgaliskajā raidejumā “Kolnasāta” sastdīnis vokorā 18.20 stuņdēs, kai ari video formatā byus nūsaverams Sabīdryskūs medeju portalā LSM.lv i latgalīšu kulturys ziņu portalā lakuga.lv. Ituo gods diktatā akters, muzikis i pasuokumu vadeituojs Kristaps Rasims skaiteis fragmentu nu latgalīšu puosokys ap lopsu i rubynu. Diktatu organizej Latvejis Radejis Latgolys multimedeju studeja, latgalīšu kulturys kusteiba “Volūda” i portals lakuga.lv.
Svietejūt Vaļsts volūdys dīnu, par tradiceju palykuse pasauļa diktata latvīšu volūdā raksteišona, kas itūgod byus dasmytū reizi (vaira par X pasauļa diktatu latvīšu volūdā var izzynuot raksti.org). Tok, izsverūt latvīšu volūdys byušonu vysaidai, kotrys grybātuojs sevkur pasaulī jau ostoitū reizi teik aicynuots paraudzeit spākus raksteišonā ari latgaliski, kas ir ūtrei normātuo latvīšu volūdys rokstu tradiceja.
Ostoitais diktats latgalīšu rokstu volūdā skanēs sastdīnis, 12. oktobra, vokorā 18.20 stuņdēs latgaliskajā raidejumā “Kolnasāta” Latvejis Radejis 1 eterā, kai ari video formatā varēs vērtīs Latvejis Sabīdryskūs medeju portalā LSM.lv i latgalīšu kulturys ziņu portalā lakuga.lv, taipat Latvejis Radejis Latgolys studejis i portala lakuga.lv socialūs teiklu profilūs.
Diktata tekstu itūreiz skaiteis akters, muzikis i pasuokumu vadeituojs Kristaps Rasims, kurs ir ari vairuoku latgalīšu radejis īstudiejumu muokslinīcyskais vadeituojs. Itūgod Latvejis Radeja sataiseja audio puosoku lītuotni, kuru plānuots papyldynuot ari ar puosokom latgaliski, taipat itūgod sovu symtgadi svietej Latvīšu folklorys kruotive, deļtuo ostoituo diktata teksta fragments byus puosoka ap lopsu i rubynu, kas izalaseita nu profesora Pītera Šmita sastateituo latgalīšu puosoku kruojuma. Puosokys teksts latgalīšu rokstu volūdā sagataveits, īvārojūt 2007. godā apstyprynuotūs nūsacejumus. Kod diktats byus izskaniejs, teksts puorbaudeišonai byus daīmams portalūs lakuga.lv i LSM.lv.
Latgalīšu volūdys diktata raksteit grybātuojim ari itūgod teik pīduovuota vareiba tekstu raksteit tīšsaistis formatā, kai ari, ka ir gribiešona, īsnēgt tū klaidu puorbaudeišonai. Tū varēs dareit ite: ej.uz/LTGdiktats2024.
Diktatu latgalīšu rokstu volūdā organizej latgalīšu kulturys kusteiba “Volūda”, latgalīšu kulturys ziņu portals lakuga.lv i Latvejis Radejis Latgolys multimedeju studeja, bet atbolsta Latvejis Radeja, Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu i Vaļsts kulturkapitala fonds.