“Volūda” ari itūgod pīsadaleis sarunu festivalā LAMPA
Sarunu festivals LAMPA izziņuojs konkursa rezultatus i zynoms, ka ituo gods festivalā programā pīsadaleis ari latgalīšu kulturys kusteiba “Volūda”, kūpā ar Latvejis Radejis Latgolys studeju i bīdreibu “New East” pīduovojūt redzīņu performanci “Šudiņ vakareņuos “Latgolys zylūņs”!”. Pasuokums byus Ciesīs sastdiņ, 10. junī, nu 17.30 da 19.00 festivala “Regionu skotivē”, kurei ari itūgod topuse ar British Council puorstuovnīceibys Latvejā atbolstu.
Redzīņu performancis uzmaneibys centrā byus Latgolys regions i tuo problemys – “zylūņs ustobā”, kura esameiba ir zynuoma, bet par kuru baiss runuot ci nūsaukt vuordā. Bīži ituos problemys nateik publiski apsprīstys, ci par tuom runoj tikai konkretūs breižūs, pīmāram, eisu breidi piec Saeimys vieliešonom, kod rezultati Latgolā “otkon” puorsteidz Latveju. Pasuokums byus veiduots kai vakarenis pi gara golda ar treis kuortu “iedīnim”, kurā kotrs “iedīņs” ir kaida problema, kaida “Latgolys zylūņa” daļa, par kuru runojūt, diskutejūt i rysynūt, kūpeigim spākim var nūīt pi lobuokuo recepta, kai ar tū tikt golā i “apēst”.
Vakareņuos pīsadaleis vairuoku jūmu eksperti, vīdūkļu i kūpīnu līderi, i iz skotivis tiks aicynuoti ari interesenti nu auditorejis, lai kūpeigim spākim atrostu koč vīnys nu problemu rysynuojuma vierzīni – “zylūņa” apiesšonys receptu.
Pasuokumu organizejam kūpā ar Latvejis Radejis Latgolys studeju i bīdreibu “New East”, moderēs Vladislava Romanova – plašys sabīdreibys diskusejis izraisiejušuos filmys “Daugavpils – iespēju vai nespēju pilsēta?” autore.
Pārnejuo gods diskuseju “Paļdis nūvodam, ka aizslēdze školu!”, iz kuru aicynuojom kūpā ar Latvijas Radio Latgolys studeju, var nūsavērt ITE.
Diskusejis byus vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
