Aicynojam iz puosoku gruomotys “Kai palikt par eistynu luoci” atkluošonys svātkim Rēzeknē
Ituo gods janvara golā latgalīšu kulturys kusteiba “Volūda” izdeve literatis Meldrys Gailānis i muokslineicys Līgys Mundys emoceju puosoku gruomotu saimem “Kai palikt par eistynu luoci”. Ūtardiņ, 22. aprelī, 12 stuņdēs dīnā Rēzeknis vaļstspiļsātys Bārnu bibliotekā byus puosoku gruomotys atkluošonys svātki i vareiba satikt kai gruomotys autoris, tai dzierdēt puosoku skaitejumu. Leidza ar aicynuojumu iz svātkim “Volūda” pīduovoj vareibu īpasazeit ar īprīšk sagataveitūs izdavumu par Meikuleņu digitalajom versejom.
Jaunajā izdavumā “Kai palikt par eistynu luoci” kūpā ar luocānu Meikuleņu i juo draugim – meitineiti Martu, začineiti Pūdzeņu, ezeiti Pukšynu i cytim — muozī i lelī skaiteituoji sešuos puosokuos varēs īpazeit emocejis – naticeibu sev, augstpruoteibu, sirdeigumu, baili, skumi i prīcu, kai ari rībumu pret cytaidū. Kotrai puosokai kluotyn ir socialuos pedagogis Laurys Mičulis-Šustis sagataveiti aizdavumi, kurī emocejis paleidzēs saprast vēļ lobuok. Taipat, kab vīgluoka skaiteišona, gruomota papyldynuota ar gryutuokūs vuordu skaidruojumim latvīšu literarajā volūdā. Puosokys i aizdavumus papyldynoj muokslineicys Līgys Mundys kruosainuos ilustracejis.
Gruomotys atkluošonā, kas paradzāta par reizi piec Leldīnis, 22. aprelī, 12 stuņdēs Rēzeknis vaļstspiļsātys Bārnu biliotekā varēs satikt obejis gruomotys autoris, izzynuot vaira ap Meikuleņu, juo draugim, gruomotys tapšonys procesu, kai ari dzierdēt emoceju puosokys i luocāna i juo draugu pīdzeivuojumus Rēzeknis Tautys teatra aktrisis Jolantys Leitānis bolsā.
Stuostus par luocānu bibliotekare, literate i pīcu bārnu mama Meldra Gailāne roksta jau vaira nakai 20 godu. Jī pi Meldrys atguojuši reizē ar pleiša luocānu, kas kai bolva kaidā konkursā sovulaik pi saimis tics, atbraucūt nu Reigys. Luocāns, kuru suokuos sauce par Mikī i Mikiju, dzeivojūt Latgolā, palyka par Meikuleņu. Pyrmū reizi Meikuleņa (voi tūlaik vēļ Mikija) pīdzeivuojumus pasauļs izzynuoja 2012. godā izdūtajā gruomotā “Mikijs un viņa draugi”, bet 2018. godā izguojušajā gruomotā “Meikuleņš īpazeist omotus” luocāna pīdzeivuojumi turpynojās jau kai Meikuleņam, izzynojūt vysaidus omotus — ausšonu, izšyušonu, klyugu peišonu i cytus. Leidza ar aicynuojumu iz jaunuokuo izdavuma par luocānu Meikuleņu svātkim, “Volūda” pīduovoj vareibu digitalā veidā tikt ari pi īprīšk izdūtuos gruomotys “Meikuleņš īpazeist omotus” (2018) digitaluos versejis, kai ari sovulaik sagataveituo, bet da ituo naizdūtuo “Meikuleņš īpazeist omotus” kruosojamuos gruomotys digitaluo varianta – obejūs izdavumūs daīmams teksts kai latgalīšu rokstu, tai latvīšu literarajā volūdā. Digitalūs izdavumus var nūpierkt i zamynīluodēt latgalīšu kulturys kusteibys “Volūda” atbolsta platformys-veikala http://voluda.lv sadaļā “Volūda saimem i bārnim”.
Izdavumu saimem i bārnim “Kai palikt par eistynu luoci” izdavuse latgalīšu kulturys kusteiba “Volūda”, bet izdūšonu finansiali atbaļstejuse Vaļsts kulturkapitala fonda mierkprograma „Latvīšu viesturyskūs zemu atteisteibys programa“. Programu Latgolā administrej Latgolys regiona atteisteibys agentura. Gruomotys atkluošonys nūtikšonā tolkā īt Rēzeknis vaļstspiļsātys Bārnu biblioteka i Rēzeknis Tautys teatris.
Jaunais izdavums “Kai palikt par eistynu luoci” daīmams kusteibys “Volūda” atbolsta platformā-veikalā http://voluda.lv, dizaina koncepta veikalā “Kabata” i gruomatneicā “Liesma” Rēzeknē, kai i “Jānis Roze” gruomatneicu teiklā i škārsteikla veikalā.