Sarunu festivalā LAMPA aicynojam iz diskuseju “Paļdis nūvodam, ka aizslēdze školu!”
Taišni itys Namaterialuos kuturys montuojuma centra “Upīte” vadeituoja Andra Slišāna pasceitais teikums “Paļdis nūvodam, ka aizslēdze školu!” Latgalīšu kulturys goda bolvā “Boņuks 2021”, sajemūt bolvu par izalauzšonys ustobu “Pīci panti”, ir tics par moto ituo gods sarunu festivala LAMPA sarunai, kurū kūpā roda Latvejis Radejis Latgolys multimedeju studeja, bīdreiba “LgSC” i latgalīšu kulturys ziņu portals lakuga.lv. Sarunu varēs pīdzeivuot kluotīnē sarunu festivalā LAMPA Ciesīs sastdiņ, 2. julī, nu 15.00 da 16.00 festivala “Regionu skotivē”, kurei itūgod topuse ar British Council puorstuovnīceibys Latvejā atbolstu.
Izalauzšonys ustoba, īrokstu studeja, kopeja grauzdātova, multimediala ekspoziceja i festivali – kas itam vysam ir kūpeigs? Taids ir slāgtūs školu Latgolā – Upītē, Leņdžūs i Lūznovā – jaunuo dzeive.
Jau vairuokus godus Latvejis izgleiteibys sistemys optimizacejis dīnys parāda vīns nu suopeiguokūs punktu ir školu likvidaceja. Itys lāmums īrosts roda daudzi vaicuojumu kai par tū, kū dareit ar školys sātom, tai ari par tū, kai tys ītekmej vītejū kūpīnu i vītys atteisteibu, nu nareši taišni školys likvidaceja var byut kai pyrmais atspierīņa punkts vītys transformacejā. Diskusejā “Paļdis nūvodam, ka aizslēdze školu!” byus vareiba īpasazeit ar treis Latgolā slāgtūs školu “dzeivisstuostim” – kai tuos dabuojušys cytu izmontuošonys veidu i tykušs par vītejuos kūpīnys jaunajim centrim. Itūs stuostu mierkis ir īdvesmuot ari cytys Latvejis regionu vītys, kurom saguojs leidzeigs liktiņs – slāgta škola, dūmuot, radeit i meklēt veidus, kai nu vīnys pusis skumais lāmums var radeit pozitivys puormainis.
Sūpluok slāgtūs školu jaunajim stuostim, simboliski byus vareiba nūbraukt gostūs ari iz Ludzys nūvodu, kurā ari itūgod ir školys, kuruos jaunā vuiceibu godā školāni vys tik vuiceitīs naīsuoks. Voi ite ari piev laika var tapt kaid īdviesmis pylns stuosts?
Sarunys golā turim nūceju radeit treis sūļu ceļvedi pošvaļdeibom i uzjiemeigajim jaunūs školu stuostu taiseituojim, kas var nūderēt cytu slāgtūs školu sātu transformacejis radeituojim.
Diskusejā pīsadaleis Namaterialuos kulturys montuojuma centra “Upīte” direktors Andris Slišāns, “KUUP kopeja grauzdātova” saiminīks Oskars Maculevičs, Lūznovys muižys puorvaļdneica Iveta Balčūne, Ludzys nūvoda pošvaļdeibys dūmis prīšksādātuoja vītineica Ināra Silicka, diskuseju vadeis Latvejis Radejis Latgolys multimedeju studejis vadeituoja Renāte Lazdiņa.
Šaļteņu pyrmai piec diskusejis kotram grybātuojam byus vareiba praktiski sajust daļu nu kotrys slāgtuos školys jaunuos dzeivis – paraudzeit latgaliskuos izalauzšonys ustobys “Pīci panti” aizdavumu voi īsajust tyltu byuvis inženera uodā.
Aicynojūt iz diskuseju, bīdreibys “LgSC” vadeituoja Edeite Husare soka: “Sarunu festivalā LAMPA pa reizei īsaskaņ ari latgalīšu volūda, deļtuo ari gribējuos, kab itys gods nav izjāmums. Sadarbeibā ar ilggadeigajim partnerim latgalīšu volūdys popularizēšonā – Latvejis Radejis Latgolys studeju i bīdreibys portalu lakuga.lv – itūgod izlēmem pīsadaleit festivalā, izmontojūt British Council puorstuovnīceibys Latvejā Regionu skotivis konkursu. Ituos reizis tema ir raudzeišona apsavērt kai iz tū, ka školu sliegšona ir cīši lela regiona bāda, nu reizē redzēt tamā jaunys īspiejis i nasakoncentrēt iz skumeigū daļu. Mums nav ticeibys, ka regionā, kur īdzeivuotuoju skaits dramatiski sasamazynoj, školu sliegšonys process nūstuos, bet mums ir ticeiba, ka školu sātys var puordzimt i, pasasokūt vītejūs aktivitatei, dūt jaunu dzeiveibu regiona vītom.”
Diskusejis “Paļdis nūvodam, ka aizslēdze školu!” nūtikšonu sarunu festivalā LAMPA pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu bīdreibys “LgSC” projektā “Latgaliskuos kulturvidis organizaceju sadarbeibys i sabīdreibys zynuošonu styprynuošona”.
