“Volūdys” zeimyna ceļš – vīna nu 29 ideju NVO pasuokumā
29. augustā Reigā Aktivūs īdzeivuotuoju fonds (AIF) aicynuoja navaļdeibys organizaceju puorstuovus pīsadaleit pasuokumā “29 idejis stypruokom organizacejom”. Sovu pīredzi, veidojūt zeimyna maiņu, puorejim pastuosteit beja ari latgalīšu kulturys kusteibai “Volūda”.
AIF treis godu laikā atbaļstejs 90 kapacitatis styprynuošonys projektus, kas paleidzējuši dažaidu sferu organizacejom styprynuot finansialū naatkareibu, uzlobuot atpazeistameibu i organizaceju puorvaļdeibu. AIF vadeituojs Ansis Bērziņš izsver, ka, plānojūt itū programu, fondam bejs svareigi naviņ atbaļsteit konkretus projektus voi organizacejis, bet ari padareit stypruoku Latvejis piļsūniskū sabīdreibu kai taidu. Fondam ir gandarejums par rezultatim, deļtuo ituo pasuokuma ideja bejuse, kab organizacejis pasadola ar pīredzi, veicynojūt ideju i pīredzis apmaiņu ap organizaceju izaugsmis vaicuojumim.
Latgalīšu kulturys kusteibai “Volūda”, kuru puorstuovēja projektu vadeituoja i vaļdis lūcekle Amanda Anusāne, beja vareiba pastuosteit par ceļu zeimyna maiņā nu “LgSC” iz “Volūda”. Taipat Amanda nu Reigys atvede idejis bīdreibys dorbam i pasuokumim iz prīšku.
Bīdreiba ir pateiceiga AIF par aicynuojumu pīsadaleit i atbolstu kapacitatis projekta eistynuošnā. Taipat eipaši sveicīni Reigā satiktajim ļaudim, kas ari kotrys sovā veidā paleidzējuši “Volūdai” palikt stypruokim – Vilim Brūverim par jaukom atmiņom nu NVO izaugsmis inkubatora ceļa Līpuojā, Henric Johansson nu izaugsmis platformys “MeYou.One”, kurs guoja tolkā meklēt i saprast, kas ir organizacejis vierteibys i kas mums pošim svareigi, kai ari myusu pošu vaļdis lūceklei i kustynuotuojai Regitai Zeiļai, kura reitiškuos pasadaleja ar sovys kasdīnys – Latvejis Socialuos uzjiemiejdarbeibys asociacejis – stuostu iz lobuoku sātyslopu.
Nūtikšonu Reigā reikuoja Latvejis Piļsūniskuo alianse, Kūrzemis NVO centrs, Valmīrys nūvoda fonds, Zemgalis NVO atbolsta centrs i Dīnavydlatgolys NVO atbolsta centrs, bet finaņsēja EEZ i Norvegejis granti i leidzfinaņsēja Reigys piļsātys Sabīdreibys integracejis programa.
#SpēcīgākasOrganizācijas #StiprākaPilsoniskāSabiedrība #AktīvoIedzīvotājuFonds #ActiveCitizensFund #EEAgrants #EEAgrantsLatvia
Fotogalerejā: īsavieršona pasuokumā
