Aizvadeits mozuok lītuotajom i regionalajom volūdom veļteitais storptautiskais seminars
Nu 1. da 4. maja Rēzeknē tykuos uorzemu i Latvejis pietnīki i mozuok lītuotūs i reginalūs volūdu entuziasti, kab daleitūs sovūs nūvāruojumūs, atziņuos i pīredzē volūdu saglobuošonā i atdzeivynuošonā.
Rēzeknē nūtyka storptautyskys seminars “Mozuok lītuotūs volūdu dokumentiešona izgleiteibys vajadzeibom”, kuru organizēja latgalīšu kulturys kusteiba “Volūda” (bīdreiba “LgSC”).
Seminara vairuokys prezentacejis beja veļteitys taišni vysaidim latgalīšu volūdys aspektim. Snorre Karkkonens-Svenssons nu “Volūdu sātys” paruodeja kūpeigū i atškireigū latgalīšu volūdys i jaunnorveģu volūdys atteisteibā. Sovukuort Tomašs Viherkevičs, Adama Mickeviča Universitatis Poznaņā profesors i sociolingvists, runuoja par latgalīšu attīksmi pret dažaidom latgalīšu volūdys raksteibys tradicejom. Sovukuort Angelika Juško-Štekele i Antra Kļavinska nu Rēzeknis Tehnologeju akademejis deve īskotu tymā, kaidys īspiejis latgalīšu volūdys pietnīceibai i latgaliskuos kulturys izzynuošonai pīduovoj Myusu dīnu latgalīšu tekstu korpuss i Myusu dīnu latgalīšu runys korpuss. Vilberts Herings nu Frīzu Akademejis Nīderlandē stuosteja par patskaņu izrunys reika apvuiceišonu i īspiejom tū izmontuot latgalīšu volūdys vajadzeibom.
Taipoš tyka aktualizāts vaicuojums par mozuok lītuotūs i regionalūs volūdu vuiceišonu. Eva Janiona nu Varšavys Universitatis stuosteja par sovu pīredzi studentim, vuicūt greko volūdu, kuru lītoj Italejis dīnvydu kolnu regionūs. Sovukuort Ilga Šuplinska, kas puorstuovēja Rēzeknis Tehnologeju akademeju i Latgalīšu kulturys bīdreibu, runuoja par latgalīšu volūdys i kulturys apgivis leidzeklim školu vajadzeibom.
Adama Mickeviča Universitatis Poznaņā profesoris Nikolis Nauys prezentaceja beja veļteita tīšsaistis vuordineicu izveidis reikim i praktiskim padūmim tū veiduotuojim. Pietneica Katrīna Tomasa nu Frīzu Akademejis īpazeistynuoja ar īspiejom īkļaut informaceju par mozuok lītuotajom i regionalajom volūdom platformā wiki.mercator-research.eu. Storptautyskū seminaru nūslēdze LU Lībīšu institūta i Tartu Universitatis pietnīka Ulda Baloža prezentaceja par lībīšu i lutsu aba Ludzys igauņu volūdu.
Seminara dalinīki i reikuotuoji gasteja ari Latvejis Radejis Latgolys studejis latgaliskajā raidejumā “Kolnasāta”. Sarunu par latgalīšu volūdu i mozuok lītuotajom volūdom cytur var nūsaklauseit ITE.
Seminars “Mozuok lītuotūs volūdu dokumentiešona izgleiteibys vajadzeibom” ir vīna nu projekta “Mozuok lītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING, Nr. 778384” (Minority Languages, Major Opportunities. Collaborative Research, Community Engagement and Innovative Educational Tools — COLING, Nr. 778384) aktivitašu.
Fotogalerejā: seminars “Mozuok lītuotūs volūdu dokumentiešona izgleiteibys vajadzeibom”, foto Amanda Anusāne
