Sarunu festivalā LAMPA aicynuosim paraudzeit “Zylūņa ausi Latgolys marinadē”
Itymā nedeļgolā, 9. i 10. junī, Ciesīs nūtiks sarunu festivals LAMPA, kurā sarunu, diskuseju i cytu nūtikšonu vydā 10. junī Regionu skotivē nu 17.30 da 19.00 iz pasuokumu “Šudiņ vakareņuos “Latgolys zylūņs”!” aicynoj ari latgalīšu kulturys kusteiba “Volūda”, Latvejis Radejis Latgolys studeja i bīdreiba “New East”.
Ituos sarunys – redzīņu performaņcis – viereibys centrā byus Latgolys regions i tuo problemys – “zylūņs”, par kuru ir zynoms, tok šaļtim beišonuos runuot skali voi nūsaukt vuordā. Bīži par tom nateik runuots nimoz voi tuos pasaruoda viņ kaidā konkretā šaļtī, par pīmāru, eisi piec Saeimys vieliešonu, kod tūs rezultats Latgolā otkon izaruoda kai puorsteigums Latvejā.
Diskusejis reikuotuoju īcere ir, ka itys festivala pasuokums byus kai vakarenis pi Latgolā īrostuo garuo golda ar treis kuortu “iedīnim”, kurymā kotrys ir kaida problema – kaida “Latgolys zylūņa” daļa, par kurū dūmojūt, diskutejūt i rysynojūt, varātu tikt da kūpeiguos lobuokuos receptis, kai ar tū tikt golā, kai tū “apēst”. Kai garšoj “Zylūņa auss Latgolys marinadē”, kaids ir “Latgolys liktiņs soldskuobajā mērcē”, cik dreiži var apēst “Latgolys zylūņa kuojis šokoladis glazurā”? Itī “iedīni” aba sarunys par Latgolys informativū telpu, jaunīšu īspiejom, biznesa vidi i cytim vaicuojumi byus vakareņu temys.
Redzīņu vakareņu vadeituoji byus kinys “Daugavpils – iespēju vai nespēju pilsēta?” veiduotuoja Vladislava Romanova i radejis personeiba Lauris Zalāns, bet kai eksperti pi golda sasatiks 14. Saeimys deputate Anna Rancāne, vīglatlete Gunta Vaičule, zemnīku saimisteibys “Amatnieki”/”Riekstiņi” puorstuovs Elvis Bartkevičs, bīdreibys “New East” vadeituojs Jorens Dobkevičs, Latvejis Bankys ekonomists Olegs Krasnopjorovs i raidejuma “Bez Tabu” žurnalists Roberts Blass.
Pasuokums byus kai latvīšu literarajā, tai latgalīšu volūdā. Festivals kotram interesentam ir bez īīšonys moksys. Diskusejis īroksts piečuok skanēs ari kaidā nu Latvejis Radejis Latgolys studejis raidejumu “Latgolys stuņde”. Paļdis Britu padūmei Latvejā par vareibu pīsadaleit festivalā Regionu skotivē i pasaceņst, kab i itūgod LAMPĀ skaņ latgalīšu volūda!
“Šudiņ vakareņuos “Latgolys zylūņs!”” ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
