Aicynojam paleidzēt saprast demokrateju i tuos procesus Latgolā
Kai ļauds Latgolā pīdzeivoj puormaiņu laiku, kai saradz dažaidu sabīdreibys grupu sova vyds mejīdarbeibu i kai pīdzeivoj demokrateju kasdīnā – par itaidom temom pīktdiņ, 12. majā, nu 15.00 da 17.30 Rēzeknis Centralajā bibliotekā diskutēt, pasadaleit redzīnī i īt tolkā izprast situaceju regionā Rēzeknis i nūvoda īdzeivuotuojus aicynoj fonds atvārtai sabīdreibai DOTS. Fondam ar Rēzeknis diskusejis organiziešonu īt tolkā ari latgalīšu kulturys kusteiba “Volūda”.
Itūšaļt kai Latvejis, tai Eiropys sabīdreibā var redzēt leluoku polarizaceju i fragmentaceju, kū jo eipaši ītekmējušys dažaidys krīzis, kas ar mums ir nūtykušys pādejūs godūs, – Covid-19 pandemeja, Krīvejis agresivais ībrukums Ukrainā, ekonomiskuo i energetikys krīze i c. Kai itī apstuokli ītekmej demokrateju i kai itei apstuokļu puorsameišona sajiutama sabīdreibā kasdīnā Latgolys regionā, ar dialogu apļu metodi Rēzeknē gryb saprast Latvejis leluokuo demokratejis festivala – Sarunu festivala LAMPA – rekuotuojs fonds atvārtai sabīdreibai DOTS.
Saruna byus 12. majā nu 15.00 da 17.30 Rēzeknis Centralajā bibliotekā, i tei tiks organizāta kai dialogu apli, kurūs kotrys sarunys dalinīks var lobuok saprast apsaveramū vaicuojumu, dzierdēt cytu cylvāku dūmys i paust sovu redzīni. Dialoga apļu mierkis ir puorrunuot i izzynuot, kai ļauds Latgolā pīdzeivoj itū puormaiņu laiku. Golvonī vaicuojumi, kuri tiks puorrunuoti, ir par demokratejis nūzeimi kotra dzeivē i izpratni par tū, voi demokrateja Latgolā ir apdraudāta i kai tei izapauž, kai ari, voi Latgolys sabīdreibā var redzēt sabīdreibys polarizaceju i dažaidu grupu kategoriziešonu.
Fonda atvārtai sabīdreibai DOTS izpilddirektore Ieva Morica, kurys saknis ari ir Latgolā, Aglyunys pusē, aicynojūt iz nūtikšonu, soka: “Saleidzynojūt ar daudzom cytom vaļstim pasaulī, Latveja demokratejis indeksu topūs ir vysā lobā pozicejā, tok reizē ari redzim, ka pādejūs godu nūtikšonys demokrateju cīši ītekmej. Latgolys dzeivuotuoji jau viesturiski pīroduši pi leluokys pi vysaida etniskuo sastuova, volūdu, ari vysaidu redzīņu sūpluok byušonys, deļtuo cīši nūvērtēsim pošu Latgolys dzeivuotuoju redzīni, kū jim nūzeimej demokrateja itūšaļt, i voi ari ite nūteik puorsameišona.”
Dialogu apļūs “Ko man nozīmē demokrātija (kai es tū saprūtu)?” pasadaleit ar sovu redzīni par demokrateju Latgolā aicynuoti Rēzeknis, tuos apleicīnis i cytu Latgolys vītu dzeivuotuoji naatkareigi nu vacuma i nūsadorbuošonys. Pīsadaleišona ir bezmoksys i īprīšk dasasaceit nav vajadzeigs, tok, ka ir gribiešona, paviesteit par byušonu var, aizpyldūt nūtikšonys anketu: bit.ly/3LoHLSJ.
Rēzeknis dialogu apli ir vīna nu nūtikšonu storptautyskuo demokratejis izpētis projekta “Demokrateja Covid-19 pandemejis laikā Baļtejis vaļstīs” eistynuošonā. Projekts teik dareits sadarbeibā ar Atvārtuos Leitovys fondu i Atvārtuos Igaunejis fondu, bet tū finaņsej Eiropys Savīneiba. Dialogu apļu “Ko man nozīmē demokrātija (kai es tū saprūtu?)” nūtikšonai Rēzeknē īt tolkā latgalīšu kulturys kusteiba “Volūda” i Rēzeknis Centraluo biblioteka.
Sūpluok dialogu aplim interesenti teik aicynuoti īsavērt bibliotekys sagataveitajā gruomotu izstuodē “ES i demokrateja”.
