Paleidzēt kustētīs iz prīšku latgaliskajam zīduošonys platformā-veikalā voluda.lv
Tikū viesteits par bīdreibys “LgSC” zeimyna maiņu iz “Latgalīšu kulturys kusteiba “Volūda””, nu reizē ar tū bīdreiba attaisejuse ari sovu zīduošonys platformu-veikalu voluda.lv, kab pīsaisteitu atbolstu vēļ vaira latgaliskūs dorbu īkustynuošonai, aizsuokšonai i padareišonai, kai ari pīduovuotu ārtuoku vareibu nūpierkt da ituo radeitūs dorbus.
Jaunais zeimyns “Latgalīšu kulturys kusteiba “Volūda”” ar saukli “Volūda, kas saviļņoj” precizuok raksturoj bīdreibys sajiutu i procesus, ar kaidim aizrauteigi struodoj bīdreiba – vysu dorbu pamatā vaira voi mozuok ir latgalīšu volūda i ar tū saisteitais vysaižūs aspektūs. Itūs aspektus i dažaidūs vierzīņus, kaidā bīdreiba struodoj, beja gribiešona paruodeit ari naīrostuokā veidā, reizē aicynojūt sabīdreibu atbaļsteit “Volūdys” dorbu, kab latgalīšu kultura vēļ vaira kustīs iz prīšku.
Zīduošonys platforma-veikals voluda.lv ari ir vīns nu Aktivūs īdzeivuotuoju fonda atbaļsteituo bīdreibys “LgSC” kapacitatis styprynuošonys projekta rezultatu, kurā beja īcere vaira dūmuot ari par tū, kai bīdreiba var palelynuot sovus saimnīcyskūs ījāmumus i dažaiduot saimnīcyskū darbeibu, kab palelynuotu stabilitati i mozynuotu atkareibu nu dažaidu projektu finansiejuma. Itymā procesā bīdreibys “LgSC” komandai paleidzēja ari īsasaisteišona Līpuojis bīdreibys “Imapct HUB” eistynuotajā “NVO izaugsmis inkubatora” programā ituo gods pavasarī i vosorā, kur daļa nūdarbeibu beja veļteita taišni saimnīcyskūs ījāmumu īspiejom navaļstiskajom organizacejom.
Vīna nu projekta aktivitatem beja plānuota ari zīduojumu pīsaistis kampaņa, deļtuo tei ir ari taišni jaunuos zīduošonys platformys-veikala vīns nu pamata aizdavumu – veicynuot zīduojumu pīsaisti kusteibys dorbam. Koč ari zīduošonys kampaņa projekta laika grafikā beja plānuota daudzi agruok, tū aizkavēja dorbs pi zeimyna tapšonys – jau suokumā, puorrunojūt zīduojumu pīsaistis strategeju ar zeimyna i jaunuos identitatis idejis autoru Raimondu Plataci, beja skaidrys, ka zīduojumu pīsaiste juodora jau ar jaunū bīdreibys identitati. Taipat mulsumu radeja pasauļa procesi – īsuokumā situaceja ar Covid-19, kod ruodejuos, ka veseleibys vaicuojumi sabīdreibā ir aktualuoki nakai atbolsts latgaliskajam i piečuok Krīvejis ībrukums Ukrainā, kod logiska beja ari bīdreibys informacejis kanalu izmontuošona aicynuojumim atbaļsteit ukraiņus, na taidā – na cīši pīmāruotā breidī – lyugt atbolstu sovam dorbam.
Tok reizē ar zeimyna dorbim izakristalizieja ari zīduošonys kampanis ideja par itaidys platformys sataiseišonu, kurys golvonuo ideja ir škārsteikla veikals, kurā var nūpierkt ideju par kaidu padareitu dorbu – taidā veidā atbaļsteit bīdreibys dažaidūs darbeibys vierzīņus. Zīduojumu pīsaistis kampanis strategejis autors Raimonds Platacis soka: ““Latgalīšu kulturys kusteiba “Volūda”” simboliski paruoda tū, ka bīdreiba ir īkustynuojuse, aizsuokuse cīši daudzi latgaliskūs iniciativu i turpynoj tū dareit iz prīšku. Deļtuo ari zīduojumu pīsaistē gribiejom paruodeit, ka kotrys atbolsts ari ir kusteiba iz prīšku – leluoks voi mozuoks sūļs, bet tyvuok rezultatam.”
Zīdiejumu platformā-veikalā ir vairuokys sadalis, kas atbiļst bīdreibys kasdīnys dorbam. Sadaļā “Atbaļsteit” kotrys interesents var zīduojuma veidā atbaļsteit kaidu bīdreibys jau aizsuoktū dorbu voi ideju – ar taidu naudys summu, kaida ir vareiba, bet dorbu var paleidzēt kustynuot iz prīšku. Koč ari bīdreibys darbeibys vierzīņu ir vaira, kūpā ar Raimondu tyka cikom atlaiseiti četri: atbolsts bīdreibys dorbam latgalīšu izdavumu sagataveišonā, atbolsts vīneigajam medejam latgalīšu volūdā, atbolsts bīdreibys folklorys kūpai “Ceidari”, kura 2023. godā sveiteis 10 godu jubileju, kai ari atbolsts aktivitatem taišni jaunīšu i bārnu auditorejai. Nu sadaļā “Nūpierkt” ir atrūnams bīdreibys škārsteikla veikals, kurā var nūpierkt kai realus bīdreibys sataiseitūs produktus – gruomotys, izdavumus, uzleimis, tai ari digitalus bezmoksys produktus i ari pakolpuojumus, par pīmāru, latgalīšu volūdys konsultacejis voi apvuiceibys. Ari sevkurs pierkums veikala sadaļā ir atbolsts bīdreibys dorbam iz prīšku.
Niu, kab veicynuotu atbolstu bīdreibys dorbim, izmontojūt jaunuos vizualuos identitatis īspiejis, bīdreiba plānoj par kotru nu daīmamajim produktim i dorbu idejom vaira stuosteit sovūs socialajūs teiklūs. Taipat zīduošonys platformā-veikalā dalykta informaceja ari jau par da ituo sataiseitū zīduošonys īspieju car moksuojumu platformu “Mobilly”.
Bīdreibys vadeituoja Edeite Husare soka: “Da ituo mes kai bīdreiba naasam eipaši praktiziejuši aicynuojumus myus atbaļsteit zīduojumu veidā, ir bejuši viņ atseviški gadīni portala lakuga.lv darbeibys nūdrūsynuošonys eipaši kritiskajūs breižūs, deļtuo AIF projekts i “NVO Izaugsmis inkubatorā” dzierdātais ir cīši lobs pamudynuojums tū suokt dareit. Kai “Mobilly”, tai sova zīduošonys platforma mums ir jauna pīredze, aiztuo asam jo eipaši prīceigi, ka ir īsadevs atrast sovu eipašū veidu, kai zīduojumu i atbolstu bīdreibys dorbam sasaisteit ar konkretu plānu, kū gribim padareit i dūt leluoku ticeibu myusu dorbam tim, kuri izlems myus atbaļsteit.”
Atbaļsteit bīdreibu var tuos zīduošonys platformā-veikalā ITE voi moksuojumu platformā “Mobilly” ITE.
________________
Zīduošonys platforma-veikals ir vīna nu projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu. Projekts tyka eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.
