Deļkuo “LgSC” niu ir “Volūda” i kai ar tū guoja?
Jau viesteits, ka iz prīšku bīdreiba “LgSC” dorbuosīs ar zeimynu “Latgalīšu kulturys kusteiba “Volūda””, deļtuo 10. novembrī aicynuojom bīdreibys profilā socialajā teiklā “Facebook” pīsadaleit sarunā par itom puormaiņom.
Sarunā pīsadaleja bīdreibys “LgSC” vadeituoja i zeimyna mainis dorbu koordinatore Edeite Husare i bīdreibys jaunuos identitatis radeišonā pīsaisteitais vīns nu Latvejis lobuokūs reklamys sferys specialistu Raimonds Platacis. Sarunys laikā tyka izstuosteits kai par zeimyna mainis procesu, jaunuo zeimyna ideju, tai ari runuots par tū, voi i cik daudz navaļstiskajom organizacejom vajag dūmuot par sovim zeimynim kai taidim. Taipat runuotuoji dasadyure ari vaicuojumam, voi zeimyna taiseišona latgaliski kai atsaškir nu gadīņu, kod tys juodora īrosti latvīšu literarajā volūdā.
Vaira par bīreibys “LgSC” puortapšonu “Latgalīšu kulturys kusteibā “Volūda”” stuosteits ari ITE.
______________
Zeimyna maiņa ir vīna nu projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu. Projekts tyka eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.
