Bīdreibys “LgSC” atteisteibys i dorbuošonuos četri vierzīni

Bīdreiba “LgSC” ar Aktivūs īdzeivuotuoju fonda (AIF) atbolstu turpynoj struoduot pi organizacejis kapacitatis styprynuošonys. Ituo gods 16. janvarī nūtyka jau catūrtuo “LgSC” bīdru sasatikšona, kab struoduotu pi bīdru i bīdreibys izaugsmis i leluokys kūpeibys sajiutys.

Svātdīnis, 16. janvara, reitā bīdreibys “LgSC” aktivisti sasatyka jau catūrtajā bīdru i bīdreibys izaugsmis i kūpeibys styprynuošonys programys reizē, kab itamā reizē kūpā vaira dūmuotu i struoduotu pi bīdreibys strategejis i tuos eistynuošonys aktivitatem. Itūreiz, jemūt vārā īprīškejuos sasatikšonuos rodušuos idejis, “LgSC” bīdri struoduoja ar četru vierzīņu, kurī itūšaļt īsazeimej kai bīdreibys atteisteibys potencialī celi i taidi varātu byut tyvuokūs pīcu godu planā, idejom. Tī ir:

• LTG kvartals – sāta, komplekss, vasals kvartals, kurymā dorbojās bīdreibai cytys organizacejis, uzjāmumi, kuri sovā vydā sasadorboj, papyldynoj vīns ūtra, vīta, kur dzimst idejis – taida kai latgaliskuo sola ari sajušanai iz vītys. Saīt kai divi funkcejis: ideju i dorbu dzimšonys vīta i vīta, iz kurū atīt i sajust latgaliskū goru.
• Vysi roksta latgaliski – kai koncepts par volūdys populariziešonu, praktiskū vuiceišonu. Seminari, kursi, vuiceibu materiali i vysys cytys formys i aktivitatis, kas paleidz izgleituot sabīdreibu i popularizēt volūdu. 
• Vysi skaita (losa) latgaliski – kai koncepts par latgaliskuo pīlītuošonu i prasmem: gruomotu izdūšona, portals lakuga.lv i cytys aktivitatis, kas vārstys iz volūdys praktisku kasdīnys lītuošonu (uztveris veidā). 
• Vysi kustīs/roda latgaliski – kai koncepts cytom aktivitatem, īrūsmem, dorbim, sabīdreibys īsaistei par i ap latgaliskū. Pasuokumi, muzykalys aktivitatis, praktiskuos i kasdīnā lītojamuos lītys, pylsūniskuo aktivitate – taida veida vierzīņs.

“LgSC” apvuiceibu programu voda izaugsmis platformys MeYou.One treneri Ieva i Henriks (Henric) Johansoni (Johansson). Itamā reizē treneri kūpā ar sasatikšonys dalinīkim struoduoja pi praktiskim i konkretim sūlim nūsauktūs vierzīņu atteisteišonai, nu pyrma tuo kotram beja vareiba paraudzeit vingrynuojumus kaidu dorbu padareišonys motivacejis ceļšonā. Ieva i Henriks atguodynuoja, ka pamata līta, kab koč kū dareitu i ari dabuotu rezultatu, ir izvēle gribēt tū padareit.

Apvuiceibu programys sasatikšonys nūtykušys jau majā, oktobrī i decembrī, bet pādejuo, kas byus jau pīktuo, sasatikšonys reize īcarāta martā. Taipat pārnejuo gods julī bīdreibys bīdri izmontuoja īspieju pīsadaleit pyrmauos individualajuos koučinga sesejuos, ūtruo koučinga seseju reize byus ituo gods pavasarī. “LgSC” bīdru i bīdreibys izaugsmis i mentoringa programā var īsasaisteit kotrys “LgSC” bīdrs voi potencialais interesents sevkurā breidī. Vaira dazynuot var, rokstūt Edeitei edeite@lgsc.lv.

Nu 2021. goda 1. maja da 2022. goda 30. apreļa bīdreiba “LgSC” eistynoj projektu “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”. Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja. Sajimtais atbolsts 19 994,87 €. Vaira par projektu var izzynuot ite: https://lgsc.lv/aktivus-idzeivuotuoju-fonds/.