“LgSC” bīdri izzynoj motivaceju dareit i tuos veidus
Bīdreiba “LgSC” ar Aktivūs īdzeivuotuoju fonda (AIF) atbolstu strodoj pi organizacejis kapacitatis styprynuošonys, par prioritati izvierzejūt bīdru i bīdreibys izaugsmis i leluokys kūpeibys sajiutys radeišonu. Decembra vydā, 19. decembrī, nūtyka jau trešuo programys sasatikšonys reize.
Svātdīnis, 19. decembra, reitā kai “LgSC” aktivī, tai i itūšaļt bīdreibys dorbā mozuok īsaisteitī (sovulaik aktivī voi taidi, kurim vyss vēļ prīškā) bīdri sasatyka trešajā bīdru i bīdreibys izaugsmis i kūpeibys styprynuošonys programys reizē, kab itamā reizē struoduotu ar motivaceju pīsadaleit organizacejis dorbā, dareit lītys i sasnēgt mierkus.
“LgSC” apvuiceibu programu voda izaugsmis platformys MeYou.One treneri Ieva i Henriks (Henric) Johansoni (Johansson), kurī itūreiz beja sagatavejuši teoretiskus i praktiskus aizdavumus par motivaceju dareit i tuos veidim. Sasatikšonys dalinīki pasadaleja kotrys ar sovu motivaceju īsasaisteit i pīsadaleit “LgSC” dorbā, bet treneri atguodynuoja, ka, nasaverūt iz tū, kaida ir kotra motivaceja, cīši svareigi kotram ir zynuot tū sovu “Deļkuo?” – deļkuo pīsadaleit kaidā aktiviatē, organizacejis dorbā voi darbeibys eistynuošonā. Izaruodeja, ka “LgSC” bīdru motivaceja ari ir cīši dažaida – kaidam tei ir īškejuo miseja, kaidam sasajušsona pīpiļdeitam, kaidam gribiešona īsasaisteit i byut aktivam, cytam sovu interešu paplašynuošona voi ideju eistynuošona, bet vēļ kaidam, koč interese dareit nav pagaisuse, dorbuošonuos ir vaira inercis piec. Kai sātys aizdavumu i ari izzynuošonu pošim sev treneri itūreiz beja sagatavejuši testu, kurā kotrys pats var nūskaidruot sovu vuiceišonuos stylu.
Apvuiceibu programys sasatikšonys nūtykušys jau majā i oktobrī, tū paradzāts turpynuot janvarī, bet pādejuo sasatikšonys reize īcarāta martā. Taipat ituo gods julī bīdreibys bīdri izmontuoja īspieju pīsadaleit pyrmauos individualajuos koučinga sesejuos, ūtruo koučinga seseju reize byus 2022. gods pavasarī. “LgSC” bīdru i bīdreibys izaugsmis i mentoringa programā var īsasaisteit kotrys “LgSC” bīdrs voi potencialais interesents sevkurā breidī. Vaira dazynuot var, rokstūt Edeitei edeite@lgsc.lv.
Nu 2021. goda 1. maja da 2022. goda 30. apreļa bīdreiba “LgSC” eistynoj projektu “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”. Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja. Sajimtais atbolsts 19 994,87 €. Vaira par projektu var izzynuot ite: https://lgsc.lv/aktivus-idzeivuotuoju-fonds/.
